"Egemen Qazaqstan" gazeti redaksııasynda Aqparat jáne qoǵamdyq damý mınıstri Aıda Balaevanyń qatysýymen zııaly qaýym ókilderi Memleket basshysy Qasym-Jomart Toqaevtyń "Jańa jaǵdaıdaǵy Qazaqstan: is-qımyl kezeńi" atty Joldaýyn talqylady, - dep habarlaıdy Egemen.kz.
Dóńgelek ústelge QR Májilis depýtattary, elimizdegi bedeldi JOO basshylary, oblystyq gazetterdiń bas redaktorlary, aqyn-jazýshylar men baspasóz ókilderi qatysty.
Jıyn barysynda sóz alǵan Májilis depýtaty Darhan Qamzabekuly ár Joldaý reformalardy júzege asyrý úshin jasalatynyn atap ótti.
"Prezıdenttiń kezekti Joldaýynda sabaqtastyq bar. О́ıtkeni Memleket basshysy Qasym-Jomart Toqaev osydan 5 jyl buryn Elbasy kótergen máselelerdiń kópshiligin ári qaraı júzege asyrýdyń joldaryn usyndy. Prezıdent Joldaýda "kesh qabyldanǵan sheshimniń ózi jaı ǵana zııan emes, ol ulttyq qaýipsizdigimizge qater tóndiredi" dedi. Bizdiń búgingi jıyn da óte der kezinde jasalyp otyr. Ár depýtattyń tıimdiligi bolýy kerek. Sonda ǵana jaqsy sapaly zańdar bolady. Bizdiń atqarýshy bılik te zańǵa jaı qaraı salmaı, búkil bolashaq strategııalyq maqsatyn oryndaýyn kózdeýge barynsha atsalyssyn dep aıtyp otyr. Menińshe ol óte durys másele", - dedi ol.
Sondaı-aq L. N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov Joldaý halyqtyń múddesine baǵyttalǵanyn sóz etti.
"Osydan 1 jyl buryn saılaýaldy naýqanǵa Prezıdent halyqtyń únine qulaq asatyn memleket qajet dep aıtqan bolatyn. Sol sóz bıliktiń ustanymyna aınalyp kele jatqanyn kórip otyrmyz. Sondyqtan da bolar osy aralyqta kóptegen máseleler kóterildi. Barynsha operatıvti túrde kóp másele sheshilip jatyr. Bılik pen halyq arasynda únemi baılanys bolýy kerek. Bizde halyqtyń oıyn estip otyratyndaı mehanızm bolýy kerek. Ony jasaıtyn partııalar, qoǵamdyq uıymdar, qoǵamdyq birlestikter, májilis, máslıhattar. Osy uıymdarǵa basa nazar aýdaryldy. Qujatta olarǵa qosymsha quqyq beriletini aıtyldy. Máslıhattar bılikke petısııamen shyǵýǵa deıin barý kerek ekenin aıtyp otyr. Bul revolıýsııalyq sheshim. Osy sheshim kóńilimizge jaqsy uıa salyp otyr. Bul qoǵamdyq uıymdar júıeli túrde eki arada baılanys jasap otyrǵanymen, bılik pen halyqtyń saıası mádenıetiniń deńgeıi bir birine jaqyn bolý kerek",- dedi Erlan Sydyqov.
Aıta keteıik, jıynnan soń Aıda Balaeva "Egemen Qazaqstan" gazetiniń tilshilerimen kezdesti. Basylymnyń atqaryp jatqan jumysyna oń baǵa bergen mınıstr ujymǵa mınıstrliktiń atynan avtokólik syıǵa tartty.