QR Aýyl sharýashylyǵy mınıstrligi men QHR Shyńjań-Uıǵyr avtonomııalyq aýdanynyń keden basqarmasy eki memlekettiń shekaralyq keden organdary basshylarynyń jyl saıynǵy otyrysy ótti, dep habarlaıdy Egemen.kz
Jıyn barysynda QR Aýyl sharýashylyǵy mınıstrliginiń ókilderi qazaqstandyq aýyl sharýashylyǵy taýarlaryn óndirýshilerdi vedomstvanyń kepildigimen Qytaıǵa eksporttaýǵa quqyǵy bar "kásiporyndar" tizimine engizý máselesin talqylady.
Sonymen qatar, Shyǵys Qazaqstan oblysynda QHR Bas keden basqarmasynyń talaptary boıynsha akkredıttelgen aýyl sharýashylyǵy ónimderiniń sapasy men qaýipsizdigin baqylaý jónindegi zerthanany ashý, sondaı-aq "Qorǵas" shekara mańy yntymaqtastyǵy halyqaralyq ortalyǵy (ShYHO) aýmaǵynda Qytaı eli attestattaǵan zerthanasy bar veterınarııalyq jáne fıtosanıtarııalyq beketterdi qurý týraly usynystar qaraldy.
Mundaı nysandardyń jumysy qazaqstandyq aýyl sharýashylyǵy ónimderiniń shekaralyq baqylaý arqyly ótýin jeńildetýge jáne jedeldetýge múmkindik beredi. Sondaı-aq, Aýyl sharýashylyǵy mınıstrligi salqyndatylǵan etke, sýbónimderge jáne QR-dan QHR-ǵa eksporttalatyn aýyl sharýashylyǵy ónimderiniń basqa túrlerine qoıylatyn veterınarııalyq-sanıtarııalyq talaptardy qaraý jáne kelisý rásimderin jedeldetýdi usyndy.
QHR Shyńjań-Uıǵyr avtonomııalyq aýdanynyń keden basqarmasy óz kezeginde Qazaqstannan keletin jylqylardyń aýrýlaryn anyqtaıtyn zerthanalyq dıagnostıkalaý júıesi boıynsha yntymaqtastyqty damytýdy usyndy.