Batys Qazaqstan oblysynda 67 myń adam tumaýǵa qarsy egilmekshi, dep habarlaıdy Egemen.kz.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, osy maqsatqa jergilikti bıýdjetten bólingen 58 mln astam teńgege Reseıde óndirilgen "Grıppol +" vaksınasy satyp alyndy.
M.Aryspaevtyń sózine qaraǵanda, bıyl oblysta tumaýǵa qarsy josparly ekpe qyrkúıektiń ortasynan bastalady. Bul azamattardyń jedel respıratorlyq aýrýlar kezinde tumaýǵa qarsy turaqty ımmýnıtetin qalyptastyrý úshin jasalady.
Tumaýǵa qarsy ekpeni aqysyz negizde medısına qyzmetkerleri, alty aıdan asqan jıi aýyratyn balalar, jetim jáne ata-ana qamqorlyǵynsyz qalǵan balalar, balalar úılerinde tárbıelenýshiler, ekinshi jáne úshinshi trımestrdegi júkti áıelder, epıdemıologııalyq kórsetkishteri boıynsha jáne júrek-qan tamyry, tynys alý júıesiniń sozylmaly dertine shaldyqqan adamdar, qarttar úıleriniń turǵyndary alady.
"Sonymen qatar tumaýdyń aldyn alý úshin ekpeden basqa saqtyq sharalaryn umytpaý kerek. Atap aıtqanda, halyq kóp jınalatyn jerlerge barýdy shekteý, bir rettik maskalardy jabyq bólmelerde jáne adamdar kóp jınalatyn jerlerde qoldaný, túshkirý nemese jótel sııaqty aýrý belgileri bar adamdarmen baılanysty shekteý, qoldy sabynmen jıi jáne muqııat jýý, muryn qýysyn tuzdy eritindimen jýý, bólmeni jıi jeldetý jáne tazalaý, ylǵaldandyrý, S dárýmeni bar taǵamdardy múmkindiginshe kóp qoldaný (múkjıdek, shyrǵanaq, qaraqat, lımon jáne t.b.), dárigerdiń usynysy boıynsha ımmýnıtetti arttyratyn dáriler men preparattardy qoldaný, salaýatty ómir saltyn ustaný, durys tamaqtaný jáne únemi jattyǵýlar jasaý qajet», dedi departament basshysy.
Jiti respıratorlyq vırýsty juqpalar jáne tumaýdyń epıdemıologııalyq maýsymy bıylǵy 1 qazannan aldaǵy jyldyń mamyr aıyna deıin sozylady. 2019-2020 jylǵy maýsymda óńirde 24 222 adamnyń JRVJ-men aýyrǵany tirkeldi. Sondaı-aq 204 adam tumaýǵa shaldyqty. Jyl saıyn oblysta turǵyndardyń 10 paıyzynan astamyna tumaýǵa qarsy ekpe jasalady.