Aýyl sharýashylyǵy mınıstriniń birinshi orynbasary Aıdarbek Saparov Ortalyq kommýnıkasııalar qyzmetinde ótken brıfıngte 2020 jylǵy egin jınaý jumystarynyń barysy jaıynda aıtyp berdi, dep habarlaıdy Egemen.kz.
"Bıyl aýyl sharýashylyǵy daqyldarynyń jalpy egis alańy 22,7 mln ga qurady. 2019 jylmen salystyrǵanda 439,2 myń ga artyq, onyń ishinde dándi jáne burshaqty daqyldar alańy 15,8 mln gektardy quraıdy. Osy jylǵy maýsym erekshe boldy. Egis naýqany qatań karantın rejıminde ótti, sonymen qatar jaz maýsymy, ótken jyl sııaqty, qurǵaq boldy", - dedi Aıdarbek Saparov.
Onyń aıtýynsha, tótenshe jaǵdaı rejımine qaramastan, egis naýqany sapaly júrgizilgen.
"Sapaly egis materıaldarymen, arzandatylǵan tyńaıtqyshtarmen, ósimdikterdi qorǵaý quraldarymen qamtamasyz etý, sondaı-aq tehnıkalyq jaraqtandyrýdy arttyrý boıynsha ýaqytyly qabyldanǵan sharalar qatań klımattyq jaǵdaıdyń áserin jumsartýǵa múmkindik berdi. Egin jınaý jumystary ýaqytyly bastaldy. Qazir ol respýblıkanyń barlyq óńirlerinde júrgizilip jatyr. Egin jınaý naýqanynyń qarqyny ótken jylǵydan joǵary", - dedi ol.
Vıse-mınıstrdiń sózine súıensek, dándi daqyldardy jınaý Jambyl oblysynda aıaqtalǵan, Túrkistan jáne Batys Qazaqstan oblystarynda aıaqtalý satysynda.
"Jedel derekterge sáıkes búgingi kúni respýblıka boıynsha barlyǵy 10,5 mln gektar dándi jáne dándi-burshaqty daqyldar nemese olardyń jalpy jınaý alańynyń 66% jınaldy, ótken jyldyń sáıkes kúninde 5,3 mln ga nemese 35% jınalǵan bolatyn. Ortasha ónimdilik 11,7 s/ga qurap, 12,2 mln tonna astyq bastyryldy. Búgingi tańda bizdiń aldymyzda turǵan eń basty mindet - ósirilgen egindi shyǵynsyz jınaý",- dedi A.Saparov.
Osy oraıda ol respýblıkada egin jınaý jumystaryn júrgizý úshin barlyq qajetti tehnıkanyń baryn aıtyp ótti.
"Jumystyń uzaq toqtaýyn boldyrmaý maqsatynda jóndeý brıgadalary quryldy, servıstik kompanııalarmen olardyń kóshpeli servısti kúsheıtý, sondaı-aq qoımalardy qajetti qosalqy bólshektermen toltyrý boıynsha jumys júrgizildi. Egin jınaý jumystaryn ýaqtyly júrgizý úshin aýyl sharýashylyǵy taýaryn óndirýshilerge 395 myń tonna arzandatylǵan janar-jaǵarmaı bólindi", - dedi vıse-mınıstr.