Panfılov aýdanynda ǵasyrdan asqan keıýana Naǵıman Shalabaeva el ómirindegi mańyzdy saıası naýqannan qalys qalmaı, alǵashqylardyń biri bolyp óz tańdaýyn jasady. 105 jastaǵy qarııa Jarkent qalasyndaǵy №290 daýys berý ýchaskesine arnaıy kelip, daýys berdi, dep habarlaıdy Egemen.kz.
О́mirdiń talaı belesin artta qaldyrǵan Naǵıman apa – úlken áýlettiń ardaqty anasy. Ol 13 bala tárbıelep ósirgen. Búginde 36 nemere, 103 shóbere, 13 shópshek súıip otyrǵan abyz ana urpaǵynyń ortasynda baqytty ǵumyr keship otyr.
Ǵasyrdan asqan ǵumyrynda el tarıhyndaǵy túrli kezeńderdiń kýási bolǵan qarııa árbir saıası naýqanda belsendilik tanytyp, azamattyq paryzyn oryndaýdy ózine mindet sanaıdy. Qart ana densaýlyǵynyń jaqsy ekenin aıtyp, jastardy el bolashaǵyna beıjaı qaramaýǵa shaqyrdy.
«Tań atqaly osy jerge kelýge daıyndalyp otyrdym. О́mirimde talaı saılaýǵa qatystym. Qudaıǵa shúkir, kópti kórdik: ashtyqty da, joqshylyqty da bastan ótkerdik. Qazir elde barlyǵy bar, soǵan shúkirshilik etý kerek. Elý jylda el jańa deıdi ǵoı. Meniń búgingi daýys berýim – sol jańarýǵa qosqan úlesim. Eshteńe istemeseń de, elińniń bolashaǵyn qoldaý – ár azamattyń paryzy. Jasymdy bersin senderge», dep aq batasyn berdi Naǵıman apa.
Daýys berýge kelgen turǵyndar da abyz ananyń batasyn alyp, erekshe qurmet kórsetti.
Aıta keteıik, Panfılov aýdanynda barlyǵy 79 referendým ýchaskesi jumys isteıdi. Aýdandaǵy 84 410 turǵyn daýys berý quqyǵyna ıe.
Referendým kúni Almatydaǵy ýchaskelerdiń birinde «Ájeler hory» án aıtty