Kalıfornııadaǵy orman órti qazir barlyq rekordty basyp ozdy. Qyzyl jalyn 12 myń sharshy shaqyrym aýmaqty kúıretip, 12 adamnyń ómirin jalmady. Jalynnan shtat aspany qyzǵylt sary túske boıalǵan, dep habarlaıdy Egemen.kz
Kalıfornııanyń soltústigindegi joıqyn orman órtteri tamyz aıynyń ortasynan bastap 1906 sharshy shaqyrym aýmaqqa taraldy. Bul el tarıhyndaǵy rekordtyq kórsetkish bolyp otyr.
Tilsiz jaýmen kúresýge 14 myń órt sóndirýshi jumyldyrylypty. 10 qyrkúıektegi jaǵdaı boıynsha 29 jerden órt oshaǵy anyqtalǵan.
Aıta keteıik, 2020 jyldyń basynan beri orman órtteri Kalıfornııada 12 myń sharshy shaqyrym aýmaqty joıǵan. Osy kezeńde oryn alǵan órt oqıǵasynyń altaýy 1930 jyldan beri qaraı eseptegende, memleket tarıhyndaǵy eń úlken órtter tizimine engizildi.
Birneshe kún boıy jalǵasyp kele jatqan qyzyl jalyn saldarynan Kalıfornııa aspany qyzǵylt túske boıalyp, kúndizgi ýaqytta da dala qarańǵy bolyp turady. Tipti, qara túnek sebebimen qalalar bul ýaqytta kóshe shamdaryn jaǵýǵa májbúr.
Bıliktiń málimetinshe, osy maýsymdaǵy órt saldarynan 12 adam qaıtys bolǵan. Biraq qurbandardyń sany áldeqaıda kóp bolýy da múmkin. О́ıtkeni keıbir aýdandardaǵy shyǵyndy esepteý áli múmkin bolmaı tur. Ázirge, órt saldarynan 3900 ǵımarat qırady. Sarapshylar bul tizimniń de aldaǵy ýaqytta ósýi múmkin ekenin aıtyp otyr.