Túrkistan oblysy Jetisaı aýdanynda bıyl 5 jańa mektep paıdalanýǵa beriledi dep josparlanǵan. Al, keler jyly 200 jáne 300 oryndyq eki mekteptiń qurylysy aıaqtalmaq, dep habarlaıdy Egemen.kz QazAqparatqa silteme jasap.
Aýdan ákimdiginiń málimetinshe, jańa bilim uıalarynyń qatarynda Eralıev aýyl okrýgine qarasty Araı aýylyndaǵy 300 oryndyq "Dáýir" mektebi bar.
Al Otan aýylynda 300 oryndyq №47 mektep salynýda. Sondaı-aq, Jetisaı qalasynda 1200 oryndyq jáne Jylysý aýyl okrýgine qarasty Baqqonys aýylynda 300 orynǵa shaqtalǵan mektepter tapsyrylady.
Budan ózge Atameken aýyldyq okrýginde 300 orynǵa arnalǵan mektep paıdalanýǵa berilmek. Osylaısha aýdanda jalpy sany 2400 balaǵa laıyqtalǵan bilim uıalary oqýshylarǵa esigin aıqara ashpaq.
Aıta keteıik, Araı aýylyndaǵy 300 oryndyq mekteptiń qurylysy 2018 jyly bastalǵan. Bıyl qyrkúıek aıynda tolyq aıaqtalady dep kútilýde.
Qazir bul mekteptiń ishine jıhaz jetkizilip, tehnıkamen jabdyqtaý jumystary júrgizilýde. Eske salaıyq, Jetisaı aýdanynda bıyl oqýshylardyń sany 44 myńnan asqan.