Aqparat jáne qoǵamdyq damý mınıstri Aıda Balaeva onlaın-petısııa ınstıtýtyn engizý baǵytynda qandaı jumys júrgizilip jatqanyn aıtyp berdi, dep habarlaıdy Egemen.kz QazAqparatqa silteme jasap.
"Qazaqstanda qoǵam ókilderi onlaın-petısııa ınstıtýtyn zańnamalyq turǵyda bekitý bastamasyn buǵan deıin birneshe ret kótergen bolatyn. Elimizde ol ınstıtýt jumysyn bastaý úshin onlaın-petısııalar boıynsha platformany ázirleý kerek. Biraq eń bastysy qajetti normatıvti-quqyqtyq baza bolýy tıis. Osyǵan baılanysty qazirgi ýaqytta biz zańnamaǵa engiziletin túzetýler paketin ázirleýdemiz", dedi Aıda Balaeva Prezıdenttik jastar kadrlyq rezervindegi azamattarmen kezdesý barysynda.
Mınıstrdiń aıtýynsha eń aldymen petısııa degenniń ne ekenin aldymen túsindirip alý kerek.
"Ekinshiden petısııa jiberý, memlekettik organdardyń petısııalardy moderasııalaý men qaraý tártibin rettegen abzal. Úshinshiden memlekettik organdardyń petısııany mindetti túrde qaraýy úshin qansha adam oǵan qol qoıýýy kerektigin aıqyndap alǵan jón", dedi Aıda Balaeva.
Eske sala ketsek búgin elordada Prezıdenttik kadrlyq rezervtegi jastar birqatar mınıstrmen kezdesý ótkizdi. Naqtyraq aıtqanda iriktelip, rezervke engen jastarmen kezdesýge Aqparat jáne qoǵamdyq damý mınıstri Aıda Balaeva, Sıfrlyq damý, ınnovasııalar men aeroǵarysh ónerkásibi mınıstri Baǵdat Mýsın, Prezıdent ákimshiligi basshysynyń orynbasary Málik Myrzalın, sondaı Prezıdenttiń kómekshisi Erlan Qarın shaqyrylǵan. Basqosýdyń basty maqsaty – Prezıdent Joldaýyn talqylap, aldaǵy ýaqytta Prezıdenttik jastar kadrlyq rezervin damytyp, júzege asyrýdy josparlaý.