Aqtóbe oblysynyń Eńbektý jáne Taldysaı aýyldaryna tabıǵı gaz keldi, dep habarlaıdy Egemen.kz.
Qýanyshty jańalyqqa aldymen Taldysaı aýylynyń turǵyndary kýá boldy. Atalǵan aýylda uzyndyǵy 18 732 m bolatyn qubyr arqyly 408 turǵyn úı, 23 áleýmettik nysan kógildir otynǵa qol jetkizbek. Aýylishilik gaz qubyrynyń alǵashqy iske qosý rásimine oblys ákimi Ońdasyn Orazalın arnaıy qatysty.
Aımaq basshysynyń aıtýynsha, ótken jyly Taldysaı, Jambyl, Eńbektý aýyldaryna gaz qubyryn salý jumystaryna qarajat bólingen. Búginde aýdan turǵyndarynyń 47,8%-y kógildir otyn ıgiligin kórýde. Jyl sońyna deıin bul kórsetkishti 56,4 paıyzǵa deıin jetkiziledi.
Jumys saparyn Eńbektý aýylynda qorytyndylaǵan oblys ákimi eldimeken turǵyndarynyń kópten kútken qýanyshyna ortaqtasyp, gaz qubyrynyń iske qosylýyna kýá boldy. Munda 59 mln teńgege iske asyrylǵan gaz qubyrynyń uzyndyǵy 6,4 km quraıdy.
Oblys ákimi Ońdasyn Orazalın Áıteke bı aýdanynyń basshysy Darhan Ermaǵanbetovke ındýstrıaldy-ınnovasııalyq damý baǵdarlamasy men memlekettik jáne jeke áriptestik sheńberinde jobalardy iske asyrýdy, shaǵyn jáne orta bıznes salasyn damytýdy tapsyrdy.