77-shi Venesııa kınofestıvaliniń "Altyn arystany" "Kóshpendiler jeri" kartınasyna tabystaldy. Basty róldi Frensıs Makdormand somdaǵan. Qytaılyq rejısser Hloıa Chjaonyń jumysy konkýrs baǵdarlamasynyń úzdik fılmi atandy, dep habarlaıdy Egemen.kz QazAqparatqa silteme jasap.
Jeńimpazdardy jarııalaýdyń saltanatty rásimi senbi kúni festıval saıtynda onlaın ótti. Chjao men Makdormand fılmniń keıipkeri Amerıkany aralaǵan vagonnan efırge shyqty.
Úzdik rejıssýra úshin beriletin "Kúmis arystan" japonııalyq Kıesı Kýrasavanyń "Tyńshynyń áıeli" fılmine buıyrdy. Al reseılik rejısser Andreı Konchalovskııdiń "Qurmetti joldastar!" fılmi arnaıy syılyq aldy.