Memleket basshysy Qasym-Jomart Toqaev Qazaqstan halqyna arnaǵan Joldaýynda: «Memleket – tıimsiz sharýager degen qaǵıda aksıomaǵa aınaldy», degen bolatyn.
Prezıdent Básekelestikti qorǵaý jáne damytý jónindegi agenttikti qurýǵa shyn máninde ótkir qajettilikti baıqap otyrǵanyn ańǵartty. Ekonomıkalyq zertteýler ınstıtýty básekelestik máseleleri boıynsha óziniń zertteýleri men taldamalyq jazbalarynda monopolııaǵa qarsy organǵa eldiń birinshi basshysyna tikeleı baǵynatyn quqyq qorǵaý organy mártebesin berý týraly máseleni birneshe ret kóterdi.
Básekelestik damyǵan kóptegen elde monopolııaǵa qarsy organ tergeý júrgizý kezinde úlken ókilettikterge ıe quqyq qorǵaý organy retinde qurylady jáne jumys isteıdi (mysaly, «tańdaǵy reıdter» jáne jaýap alýdy júrgizetin Ulybrıtanııanyń monopolııaǵa qarsy organdary (SMA); Eýropalyq komıssııa janyndaǵy monopolııaǵa qarsy zańnamanyń buzylýyn tergeý jónindegi arnaıy top; Kanada (Competition Bureau Canada); Aýstralııa (Australian Competition and Consumer Commission) jáne t.b.).
Bul rette Qazaqstandaǵy Básekelestikti qorǵaý jáne damytý jónindegi agenttiktiń qyzmeti ashyq ári tıimdi bolýy tıis dep sanaımyn. Ol úshin agenttik tergeýdiń bastalýy týraly baspasóz habarlamalaryn jarııalaýy, óziniń ınternet-portalynda júrgizilgen tergeýler jóninde esepterdiń nusqalaryn ashyq jáne qoljetimdi ornalastyrýy, sondaı-aq sapaly tergeý júrgizý úshin ekonomıkalyq taldaý ádisterin belsendi paıdalanyp, qoǵamdyq tyńdaýlardy únemi ótkizýmen birge básekelestik máseleleri boıynsha jeke sot (Trıbýnal) qurylýy qajet dep sanaımyn.
Sol sekildi el ekonomıkasyna memlekettiń qatysýyn azaıtý úshin «básekelestik beıtaraptyq» qaǵıdatyn ilgeriletýi tıis.
Erlan KÁRIMOV,
«Ekonomıkalyq zertteýler ınstıtýty» AQ jetekshi sarapshysy