Pandemııa álemdik ekonomıkany kúıretýmen qatar, jurtshylyqtyń qajettiligi men suranysyn basqa arnaǵa burdy. Sol sebepti 2020 jyldyń jańa trendteri de burynǵylardan áldeqaıda ózgeshe.
Mamandardyń pikirinshe, jyl basynan beri jahandaǵy karantındik shekteýler digital álemge de áser etpeı qoımaǵan. Máselen, bir jyl buryn adamdar túrli messendjerlerdi kóbirek qoldansa, bıyl kóptiń tańdaýy ish pystyrmaıtyn mobıldi qosymshalarǵa túsken. Sensor Tower platformasy júrgizgen saraptama da osyǵan dálel bolyp otyr.
Platforma 2020 jyldyń qańtarynan bastap qazirge deıingi aralyqta álem halyqtary qandaı qosymshany kóp paıdalanǵany jóninde zertteý jasady. Nátıjesinde, «TikTok» suranysqa ıe qosymsha dep tanylǵan. Saraptama nátıjesi 104,7 mıllıon adamnyń smarfonynda atalmysh qosymsha saqtalǵanyn jáne belsendi paıdalanatynyn kórsetti.
Aıta keterligi, bul qosymshany eń kóp qoldanatyn elderdiń kóshin Úndistan bastap tur. Munda «TikTok» júktegender jalpy sannyń 34,4 paıyzyn qamtyǵan. Al tizimdi tolyqtyryp turǵan Brazılııaǵa álemdik kórsetkishtiń 10,4 paıyzy tıesili. Kompanııa eki eldegi halyq sany da kórsetkishtiń ulǵaıýyn qamtamasyz etip otyr dep esepteıdi. Osylaısha, álemdi «ekige bólip» otyrǵan App Store men Google Play-de de birdeı suranysqa ıe «TikTok» álemdegi eń tanymal mobıldi qosymsha bolyp otyr. Dese de, qysqa beıne jasaý fýnksııasy bar qosymshanyń jastar men jasóspirimder arasynda qashanǵa deıin suranysta qalatyny sarapshylarǵa áli de beımálim.
Koronavırýsqa baılanysty jahandyq karantın kezinde onlaın rejimdegi jumys, jıyndar men túrli basqosýlar Zoom beıneqońyraýlar men konferensııalar qosymshasyn tanymal etti. Jyl basynan beri bul platformany júktegender sany shamadan tys kóbeıgen. Osylaısha, Zoom Apple paıdalanýshylarynyń arasynda tizimde ekinshi bolyp tur.
Aıta óterligi, Android qoldanýshylary arasynda Snack Video qosymshasy ekinshi orynda. Bul da qysqa beıneler jasaý fýnksııasy bar TikTok-tyń analogy.
Jyl basynda qoldanýshylary basym bolǵan Facebook jelisi ázirge úshinshi orynda tur. Bul da pikir almasý alańyna aınalǵan jeliniń joǵary tanymaldylyqqa ıe ekenin kórsetedi. Buǵan sebep, Facebook paıdalanýshylarynyń jas shamasy.
P.S. Atalǵan tizim osyǵan deıin tanymal bolyp kelgen Instagram jáne WhatsApp jelileriniń belsendiligin joqqa shyǵarmaıdy. Bul eki áleýmettik jeli de qoldanýshylar sany jaǵynan aldyńǵy qatarda. Mamandar bul áleýmettik jelilerge balama tabylmaıynsha, ázirge ózektiligi joıylmaıtynyn alǵa tartady.