Búgin Túrkistan oblysynda "Ashyq júrek" eriktiler ortalyǵynyń ashylýy boldy, dep habarlaıdy Egemen.kz.
Ortalyqtyń ashylý saltanatyna Túrkistan oblysy Qoǵamdyq damý basqarmasy "Jastarmen jumys" bóliminiń basshysy Seıdýlla Keńesbaıuly jáne Qazaqstan Eriktiler lıgasynyń Túrkistan oblysyndaǵy atqarýshy dırektory Júrsin Nurbolat, Eriktiler lıgasynyń lıderi Aıdana Esirkep jáne "Ashyq júrek" jobasynyń volonterleri qatysty.
Ortalyqtyń ashylý saltanatyna qatysqan Túrkistan oblysy Qoǵamdyq damý basqarmasy "Jastarmen jumys" bóliminiń basshysy Seıdýlla Keńesbaıuly ıgi bastamaǵa iltıpatyn bildirip, bul jobalardyń mańyzdylyǵyna basa nazar aýdarý kerektigin aıtty.
"Ashyq júrek" jobasy Qazaqstan Eriktiler lıgasy qoǵamdyq qory jastar arasynda volonterlik brendin tanymal etý úshin, Aqparat jáne qoǵamdyq damý mınıstrliginiń qoldaýymen júzege asyp jatyr. Osy joba arqyly jastar arasynda eriktilerdiń jappaı qozǵalysyn qurý, balalarda sanaly belsendi azamattyq pozısııany, jaýapkershilikti qalyptastyrýǵa jáne áleýmettik mańyzdy máselelerdi sheshý úshin qoǵamǵa qatysty oń is-áreketterdi júzege asyrýǵa yqpal etýdi kózdeıdi.
"Bizdiń uıym 2013 jyldan bastap qyzmet atqarýda jáne biz Qazaqstandaǵy eń iri volonterlik qozǵalystardyń birimiz. Búginde lıgada 7000-nan astam belsendiler qyzmet atqaryp júr jáne barlyq aımaqtarda ókilderimiz bar. Karantınniń alǵashqy kúnderinen bastap Lıga volonterleri halqymyzdyń muqtaj sanattaryna azyq-túlik sebetterin jetkizip, turǵyndar arasynda túsindirý jumystaryn júrgizdi. Osy "Ashyq júrek" jobasy arqyly da qazirgi qoǵamnyń damýynyń mańyzdy faktorynyń biri, áleýmettik kómek mádenıetin qalyptastyrýǵa kúsh salamyz", - dedi Nurbolat Júrsin.
Sondaı-aq "Ashyq Júrek" jobasy aıasynda shaǵyn granttar baıqaýy ótedi. Barlyǵy 107 shaǵyn grant bar. Qazaqstan Respýblıkasynyń barlyq óńiri boıynsha bastamashyl toptar úshin 300 000 teńgeden 56 shaǵyn grant, 300 000 teńgeden 42 shaǵyn grant 14 oblystyń volonterleri men volonterlik uıymdary úshin beriledi. Al 500 000 teńgeden 9 grant respýblıkalyq mańyzy bar qalalardyń volonterlerine arnalǵan. Mundaı múmkindiktiń bári eldegi volonterlardyń sanynyń artýyna jáne olardy áleýmettik mańyzy bar jumystarǵa tartý men ár túrli tirkeýde turǵan kámeletke tolmaǵandardyń sanyn azaıtýǵa óz septegin tıgizedi.