Keshe Premer-Mınıstrdiń orynbasary Eraly Toǵjanovtyń tóraǵalyǵymen beınekonferensııa rejiminde áleýmettik áriptestik pen eńbek qatynastaryn retteý jónindegi úshjaqty respýblıkalyq komıssııanyń otyrysy ótti.
Keńeske ortalyq memlekettik organdardyń ókilderi, oblys ákimderiniń orynbasarlary, kásipodaq uıymdary men jumys berýshiler birlestikteriniń ókilderi qatysty. Otyrysty ashqan E.Toǵjanov qazirgi jaǵdaıda jumys oryndarynyń saqtalýyn, jalaqynyń ýaqtyly tólenýin qamtamasyz etý, eńbek janjaldarynyń aldyn alý sııaqty máseleler burynǵydan da ózekti ekenin atap ótti. Vıse-premer jumys berýshiler men jumysshylardyń múddelerin qorǵaıtyn kásipodaqtardyń osy baǵyttaǵy baǵa jetpes úlesin erekshe atap ótti.
Eńbek qatynastaryn retteý úshin áleýmettik áriptestiktiń mańyzy zor. Eńbek jáne halyqty áleýmettik qorǵaý mınıstri B.Nurymbetov, sondaı-aq oblys ákimderiniń orynbasarlary áleýmettik shıelenisterdiń aldyn alý jáne áleýmettik-eńbek janjaldaryn sheshý jónindegi Keshendi jospardyń iske asyrylýy, sondaı-aq óndiristik jaraqattardyń sanyn azaıtý sharalary týraly baıandady. Sonymen qatar Respýblıkalyq úshjaqty komıssııanyń qaraýyna Úkimet pen kásipodaq uıymdarynyń jáne jumys berýshiler birlestikteriniń arasyndaǵy 2021-2023 jyldarǵa arnalǵan Bas kelisimniń jobasy usynyldy. Jańa kelisim Halyqaralyq eńbek uıymy usynylatyn tásilder men ındıkatorlaryna sáıkes ázirlenýde. Osy másele boıynsha Qazaqstan Kásipodaqtar federasııasynyń tóraǵasy Satybaldy Dáýletalın óz usynystaryn ortaǵa saldy.
Alqaly jıyn sońynda E. Toǵjanov ortalyq memlekettik jáne jergilikti atqarýshy organdarǵa birqatar tapsyrma berdi. Onda óndiristik prosesterdi turaqtandyrý jáne azamattardyń eńbek quqyqtaryn qamtamasyz etý máseleleri boıynsha memorandýmdar jasaý jónindegi jumysty jandandyrý, jumyspen qamtýǵa járdemdesý boıynsha jedel sharalar qabyldaı otyryp, qyzmetkerlerdiń bosatylýyna monıtorıngti kúsheıtý, jalaqy jáne áleýmettik tólemder boıynsha bereshekti azaıtý jóninde pármendi sharalar qabyldaý jáne basqalary qamtyldy.