Qulsary – shaǵyn qala ári Jylyoı aýdanynyń ortalyǵy. Aýdandyq ortalyq aýrýhananyń bas dárigeri Nurbek Úkibaevtyń málimetinshe, munda koronavırýs ınfeksııasyn juqtyrǵandar qatary 1078 adamǵa jetken edi, dep habarlaıdy Egemen.kz.
Qaýipti indettiń órshýine baılanysty aýrýhana janynan 40 tósektik ınfeksııalyq stasıonar men 60 tósekke arnalǵan provızorlyq ortalyq jumys istedi. Aýrýhanaǵa demeýshiler ottegi konsentratoryn alyp berip, kómek qolyn sozdy.
"Endi mine, koronavırýsqa shaldyqqan sońǵy eki pasıent saýyǵyp shyqty. Qazir aýdanda qaýipti indetti juqtyrǵan naýqastar joq. Soǵan qaramastan emdeý mekemeleri qorǵanysh kıimderimen qamtylyp, dári-dármekterdiń eki aılyq qory jasaqtaldy", deıdi Nurbek Úkibaev.