Jyl sońyna deıin Pavlodar qalasynda ánshi-kompozıtor, aqyn Estaı Berkimbaıulynyń eskertkishi boı kóteredi.
«Qorlan» ánimen álemge áıgili ánshiniń alyp eskertkishi Pavlodar qalasyndaǵy Estaı atyndaǵy mádenıet saraıynyń aldyna ornatylatyn boldy. Bul «Rýhanı jańǵyrý» baǵdarlamasy aıasynda óńirde júzege asyrylyp jatqan biregeı jobalardyń biri.
Týyndynyń avtory – astanalyq belgili músinshi Azat Baıarlın. Onyń aıtýynsha, eskertkishtiń bıiktigi 3 metrden, al tuǵyry 5 metrden asady. Qoladan quıylatyn týyndynyń qazir sońǵy jumystary jasalýda.
– Estaı Berkimbaıulynyń qolda bar sýretteriniń bári qartaıǵan shaǵynda túsirilgen. Al biz kóziniń nury taıyp, qaljyraǵan qarttyń beınesin emes, óner dúldúliniń jas kezin músinge aınaldyrdyq. Ol úshin arnaıy kompıýterlik baǵdarlamany paıdalandyq. Iаǵnı Estaıdyń sýretterin zamanaýı baǵdarlamaǵa salyp, sonyń negizinde jas kezindegi beınesin jasadyq. Músindegi ómirge qushtar, mahabbattyń sımvoly, arý bitkenniń armany bolǵan jas Estaı qolyna dombyrasyn ustap, Saryarqanyń tósinde aıańdap kele jatyr. Estaı men Qorlan arasyndaǵy kirshiksiz sezimniń belgisi – júzikti de nazardan tys qaldyrǵan joqpyz. О́mirge, Qorlanǵa ǵashyq Estaıdyń beınesin usyna aldyq dep oılaımyn, – deıdi Azat Baıarlın.
Rýhanııat janashyry Qýat Esimhanovtyń pikirinshe, Estaıdyń jas kezin beıneleý – músinshi tarapynan tyń sheshim boldy.
– Eskertkish – sýret emes. О́kinishke qaraı, kóbimiz eskertkishten dál sýrettegi beıneni kórgimiz keledi. Alaıda bul músin óneriniń tabıǵatyna tán emes. Sondyqtan Estaıdyń qartaıǵan shaǵyn emes, jas kúnin eskertkishke aınaldyrý – óte oryndy. Onsyz da bizdegi eskertkishterdiń bári «qartaıyp» barady. Avtor ómirge, Qorlanǵa ǵashyq Estaıdyń obrazyn asha bilgen dep esepteımin. Dese de erteń eskertkishke qatysty «Estaıǵa uqsamaıdy ǵoı» dep pikir aıtýshylar sózsiz tabylady. Olarǵa asa mán berýdiń qajeti joq dep oılaımyn. Jalpy, eskertkish ónerdi baǵalaıtyn jandardyń kóńilinen shyǵady degen úmittemin, – dedi músinshiniń sheberhanasyndaǵy bolashaq músindi tamashalap kórgen Qýat Esimhanov.
О́ner maıtalmany, Qazaqstannyń Eńbek sińirgen ártisi Shahımardan Ábilovtiń aıtýynsha, avtor músin arqyly Estaıdyń obrazyn dál bergen.
– Músinshige aıtylǵan irili-usaqty kemshilikter kóńildegideı rettelip, prosestiń bári oıdaǵydaı aıaqtalsa, Estaı eskertkishi sheteldikterge uıalmaı kórsetetin erekshe dúnıege aınalady. Sebebi shetel halqy Estaıdy mahabbattyń sımvoly retinde qabyldap júr. Al erteń-aq tuǵyryna qonar eskertkishten mahabbat ta, erkindik te, darqandyq ta sezilip tur, – deıdi Shahımardan Ábilov.
Músinshi Azat Baıarlın Estaıdyń týǵan nemereleri Zeken jáne Sarytorǵaı apalardyń bolashaq eskertkishpen tanysyp shyqqanyn jetkizdi. Aıtýynsha, olar óner dúldúliniń jalpy obrazyn jaqsy qabyldap, bet-beınesine qatysty kemshilikter aıtqan. Olardyń bári rettelip, tıisti mekemelermen kelisilgen soń, jaqyn kúnderi eskertkishti quıý prosesi bastalmaq.
Eske sala keteıik, Estaıdyń qola músinin qalyptap jatqan Azat Baıarlın – Nur-Sultandaǵy Sáken Seıfýlın, Omby qalasyndaǵy Shoqan Ýálıhanov eskertkishteriniń avtory. Budan bólek Maǵjan Jumabaevtyń, Turar Rysqulovtyń, Qanysh Sátbaevtyń eskertkishterin jasaǵan.