Kókshetaýda «Damý» kásipkerlikti qoldaý qory» AQ bastamasymen ashylǵan jańa ortalyq bıznes ókilderiniń belsendi qyzmetine jol ashady degen paıym aıtylýda. О́ıtkeni, KQO-nyń alǵashqy jumys kúninde-aq oblys ákimi Qosman Aıtmuhametov aksıonerlik qoǵamnyń basqarma múshelerimen birge «Dóńgelek ústel» májilisin ótkizip, jınalǵandarǵa keń kólemdi túsinik berdi.
Kókshetaýda «Damý» kásipkerlikti qoldaý qory» AQ bastamasymen ashylǵan jańa ortalyq bıznes ókilderiniń belsendi qyzmetine jol ashady degen paıym aıtylýda. О́ıtkeni, KQO-nyń alǵashqy jumys kúninde-aq oblys ákimi Qosman Aıtmuhametov aksıonerlik qoǵamnyń basqarma múshelerimen birge «Dóńgelek ústel» májilisin ótkizip, jınalǵandarǵa keń kólemdi túsinik berdi.
– Kásipkerlerge qyzmet kórsetý ortalyǵynyń jumysy buǵan deıin jaqsy tájirıbesimen kózge túsken Turǵyndarǵa qyzmet kórsetý ortalyqtarynyń ustanymdaryn damyta túspek, – dedi saltanatty rásimge qatysýshylardy quttyqtaǵan óńir basshysy Q.Aıtmuhametov. – KQO shaǵyn jáne orta bıznes ókilderine «Bir tereze» júıesimen qyzmet kórsete otyryp, olardy tolǵandyrǵan barlyq máselelerdiń sheshilýine múmkindik jasaıdy. Kásipkerliktiń sapalyq jáne sandyq baǵamyna ońtaıly áser etetin bul ortalyq oblysymyzdyń áleýmettik-ekonomıkalyq damýyna eleýli úles qosatyny anyq.
– Kez kelgen kásipker bizdiń Ortalyqtyń qyzmetin erkin paıdalana alady, – dedi «Damý» AQ basqarma múshesi Ǵabıt Lesbekov. –Jumys istep turǵan bıznes ókili bizge habarlassa, oǵan aınalym qarjysyn tolyqtyryp, jumysyn jandandyrýǵa múmkindik beretin qarjy ınstıtýtyn tıimdi tańdaýyna keńes beremiz. Al, isin endi bastaýshylarǵa ruqsat alý jáne tirkeý qujattarynan bastap, qolǵa alǵan jobasynyń tolyq júzege asýyna deıingi qyzmetter keshenin usyna alamyz. Bastysy, buryn servıstik kompanııalardyń shashyrańqylyǵy kásipkerlerge tııanaqty keńes alý úshin ýaqyt pen qarjy shyǵyny turǵysynda qolaısyzdyqtar týdyrsa, endi olar qajetti aqparatpen múldem tegin qamtamasyz etiledi.
Qolaılylyq demekshi, ortalyqta «Atameken Odaǵy» zańdy tulǵalar birlestiginiń, Aýyl sharýashylyǵyn qoldaý qorynyń, tehnologııalyq damý jónindegi ulttyq agenttiginiń, TQO, ekinshi deńgeıli bankter ókilderiniń ornalasýy kásipkerler qolyn uzarta túsetini anyq. Onyń ústine, KQO mamandary oblystyń aýdan ortalyqtarynda aıyna eki ret jergilikti kásipkerlermen kezdesip, keńes berýdi josparlap otyr.
Jańa qyzmet ortalyǵynyń jedel iske kirisip ketkeni de jaǵymdy áser qaldyrdy. Máselen, kásipkerlik qyzmetin endi bastaǵan Galına Romashına bilikti mamandardyń isti neden bastaý qajettigin túsindirip, bıznes-jospar daıyndaýǵa, qarjylandyrýdyń tıimdi túrin tańdaýǵa kómektesip, memlekettik qoldaý týraly derek bergenine rızalyǵyn bildirdi. Al, jeke kásipkerlikpen aınalysatyn Tileýbek Tasov jeńil nesıeler onyń salasyna baǵyttalmaıdy degen qate túsinikte eken. Búgin ol da memleketimizdiń nesıelik baǵdarlamalary kóptarmaqty ekendigi jóninde túsinik alýmen qatar, aınalym qarajatyn tolyqtyrýǵa qajetti qujattar daıyndaýǵa kiriskenin tilge tıek etti.
Baqbergen AMALBEK,
«Egemen Qazaqstan».
Aqmola oblysy.