Dıplomatııalyq mıssııasynyń aıaqtalýyna baılanysty Qazaqstan Elshisi Qaırat Sarybaı Slovenııanyń qazirgi jáne burynǵy basshylyǵymen, sondaı-aq eldiń saıası, ekonomıkalyq jáne mádenı toptarynyń ókilderimen kezdesti, dep habarlaıdy Egemen.kz SIM silteme jasap.
Kezdesýler barysynda ekijaqty yntymaqtastyqtyń sońǵy kezeńdegi basty jetistikteri talqylandy. Atap aıtqanda, parlamentaralyq dostyq toptarynyń qurylýy, Qazaqstannyń Slovenııada eki Qurmetti konsýldyǵynyń ashylýy, qosarly salyq salýdan bosatý Konvensııasynyń júzege asyrylýy, ekijaqty saýda aınalymynyń ósýi, "Qazaqstan-Sloven Bıznes Klýby" men Art Embassy qazaq óner elshiliginiń ashylýy, sondaı-aq Iýgoslavııa partızandary qatarynda erlikpen qaza tapqan qazaq jaýyngeri "Kasse Sebero" oqıǵasynyń eki halyq arasyndaǵy dostyq qarym-qatynastarǵa oń áseri týraly sóz boldy.
Slovenııa Respýblıkasynyń Prezıdenti Borýt Pahor Qazaqstannyń Slovenııa úshin mańyzdy seriktes ekenin atap ótip, Uly Dala elimen yntymaqtastyqty ilgeriletýge múddeli ekenin bildirdi.
Slovenııanyń buryńǵy Prezıdenti Danılo Tıýrk Qazaqstan-Slovenııa qatynastarynyń damýyna Tuńǵysh Prezıdent – Elbasy Nursultan Nazarbaevtyń eleýli úles qosqanyn jáne onyń halyqaralyq bastamalaryn atap, Prezıdent Qasym-Jomart Toqaevpen ornaǵan yntymaqtastyqty joǵary baǵalaıtynyn jetkizdi.
Sonymen qatar, Q.Sarybaı Slovenııa basshylyǵy men ekonomıkalyq jáne mádenı toptaryn Prezıdent Q.Toqaevtyń "Jańa jaǵdaıdaǵy Qazaqstan: is-qımyl kezeńi" Qazaqstan halqyna joldaýynyń negizgi basymdyqtarymen tanystyrdy.
Slovenııa Prezıdenti B.Pahor, buryńǵy Prezıdenti D.Tıýrk, Syrtqy ister mınıstrliginiń memlekettik hatshysy T.Kaızer qazaq dıplomatynyń ekijaqty qatynastardy ilgeriletýdegi zor eńbegi men aýqymdy jetistikteri úshin alǵystaryn bildirdi.