Qazaqstan Elshisi Alekseı Volkov grek dıasporasy máselelerimen aınalysatyn Grekııa Syrtqy ister mınıstriniń orynbasary Konstantınos Vlasıspen kezdesti, dep habarlaıdy Egemen.kz SIM baspasóz qyzmetine silteme jasap.
Kezdesý barysynda taraptar memleketterdiń gýmanıtarlyq saladaǵy ekijaqty yntymaqtastyq máselelerin talqylady. Atap aıtqanda, qazaqstandyq jáne grek halyqtary arasyndaǵy baılanystardy nyǵaıtý perspektıvalaryna nazar bólindi. Bul rette osy proseste Qazaqstandaǵy on myńdyq grek dıasporasynyń jáne Elladada turatyn 60 myńǵa jýyq Qazaqstan týmalarynyń eki memlekettiń qoǵamdyq, saıası, mádenı jáne basqa da salalardaǵy ómirine tikeleı qatysatyny erekshe atap ótildi.
Elimizdegi qazaqstandyq grekterdiń ómirimen jaqynyraq tanysý maqsatynda Elshi A. Volkov K. Vlasıske halyqaralyq saıahattardy jasaý úshin qolaıly epıdemıologııalyq jaǵdaılar ornatylǵannan keıin jaqyn arada Qazaqstanǵa saparmen kelýge shaqyrýyn jetkizdi.
Sonymen qatar kezdesý barysynda Qazaqstannyń Elshisi Mınıstrdiń orynbasaryna qazirgi zamanǵy Qazaqstannyń qalyptasý kezeńderiniń tarıhy týraly tamasha jónsilter bolyp tabylatyn QR Tuńǵysh Prezıdenti, Elbasy Nursultan Nazarbaevtyń grek tiline aýdarylǵan "Táýelsizdik dáýiri" atty kitabyn tabys etti.