Batys Qazaqstan oblysynyń Báıterek aýdanyna qarasty Dostyq aýylynda kámelettik jasqa tolmaǵan úsh bala jeńil avtokólikpen birge Shaǵan ózenine batyp ketti, dep habarlaıdy Egemen.kz
О́kinishke qaraı, balalardy qutqarý múmkin bolmaǵan.
Oqys oqıǵa týraly 3 qazan kúni keshki saǵat 17.00. shamasynda polısııa men tótenshelikterge belgisiz áıel habarlapty.
"Polısııanyń kezekshi bólimine habar saǵat 16.55.-te túsken. Sýyt habardy alysymen oqıǵa ornyna eń jaqyn júrgen polısııa patrýli jedel attandy. Polısııa qyzmetkerleri barǵan mezette ózenge sekirip, túgel sýǵa batyp ketken kóliktiń artqy áınegin qolymen uryp syndyrǵan. Alaıda bári kesh boldy", deıdi Batys Qazaqstan oblystyq polısııa departamentiniń baspasóz hatshysy Bolatbek Belgibekov.
Tótenshe jaǵdaılar basqarmasy jedel qutqarý jasaǵy sýdan alyp shyqqan kólikte 2011, 2013 jáne 2014 jyly týǵan balalardyń denesi tabyldy.
Ázirge belgilisi balalardyń ekeýi bir úıdiń balalary bolyp shyqty. Ata-analary balalaryn alyp, tabıǵat aıasyna demalýǵa shyqqan. Qazir polısııa qyzmetkerleri oqıǵanyń qalaı bolǵanyn tergep, tekserip jatyr.
"Osy oqıǵa boıynsha Qazaqstan Respýblıkasy Qylmystyq Kodeksiniń 140 baby, 2 bólimi boıynsha qylmystyq is qozǵalyp, keıin 119 baptyń 4 tarmaǵyna aýystyryldy", dep habarlady polısııanyń baspasóz qyzmeti.
Aıta keteıik, mundaǵy 140 bap – kámeletke tolmaǵan adamdy tárbıeleý jónindegi mindetterdi oryndamaý nemese tıisinshe oryndamaý bolsa, 119 bapta – ózin ózi saqtap qalatyn múmkindigi joq adamdy kórineý kómeksiz qaldyrýǵa qatysty qylmystar qarastyrylady.