Qazirgi tańda elimizde qandaı is qolǵa alynsa da, jahandy bir jaıpap ótken indetten aınalyp óte almaıdy. Qaıtalanýy múmkin pandemııanyń ekinshi tolqyny barlyq salada eskerilmek. Al el ekonomıkasynda eleýli orny bar, tótenshe jaǵdaı kezinde aıtarlyqtaı shyǵyn kórgen Almatyda indet qaıta órshıtindeı jaǵdaı bolsa, qala oǵan qanshalyqty qarsy tura alady?
Shahar basshysy toǵyzynshy ret turǵyndarmen tikeleı efırde kezdesip, qalalyqtardyń ózekti suraqtaryna jaýap berdi. Qalyptasqan dástúr boıynsha aldymen B.Saǵyntaev sanıtarlyq-epıdemııalyq ahýalmen tanystyryp, COVID-19 pandemııasynyń yqtımal ekinshi tolqynyna qalanyń daıyndyǵy týraly baıandady.
Almatyda densaýlyq saqtaý júıesiniń tıimdiligin arttyrý úshin birqatar pármendi shara qabyldanǵany aıan. Munda jedel qyzmet pen alǵashqy medısınalyq-sanıtarlyq kómektiń jumysyn kúsheıtýge basymdyq berildi. Budan ózge, aýrýhanalardaǵy oryn sany birtindep kóbeıtilip jatyr. KVI-men kúreste ashylatyn medısınalyq mekemelerdi eskere otyryp, 7 226 oryndy 32 stasıonar daıyndalǵan.
Buryn josparlanǵandaı, qazan aıynda jalpy qýattylyǵy 1 myń oryn bolatyn jańa mekemeler ashylady. Mysaly, 500 oryndy RV-90 jańa ınfeksııalyq aýrýhana daıyn. 300 oryndy ekinshi modýldi ınfeksııalyq gospıtal paıdalanýǵa beriledi. Budan ózge, jeke ınvestısııalar esebinen 215 oryndy eki tolyqqandy klınıka qurylatyn bolady. Qala ákimi ınfeksııalyq aýrýhanalarda jumys isteıtin kadrlardy daıarlaý týraly da aıta kele, Qoǵamdyq damý basqarmasyna baǵynyshty 74 uıym, 20 respýblıkalyq jáne 93 jekemenshik medısınalyq mekemeler bar ekenin atady. Bul uıymdarda 38 myńnan astam qyzmetker jumys isteıdi.
1 tamyzdaǵy jaǵdaı boıynsha COVID-19 indetin emdeýge densaýlyq saqtaý júıesiniń 27 uıymy jumyldyrylyp, 6 200 tósek-oryn qoıyldy. Sol kezde ınfeksııalyq stasıonarlarda 4 035 qyzmetker jumys istedi. Degenmen, epıdemııalyq ahýaldyń turaqtanýyna baılanysty kópsalaly klınıkalar ózderiniń ádettegi jumys rejimine kóshti. Koronavırýs ınfeksııasyn emdeıtin emhanalarda qazirgi kezde 93 naýqas bar. Onda 400-ge jýyq dáriger, medbıke men medısınalyq qyzmetker jumys isteıdi.
Pandemııanyń jańa tolqyny paıda bolǵan jaǵdaıda 5,5 myń medısınalyq qyzmetker rezervte tur. Medısınalyq joǵary oqý oryndarynyń oqytýshylary, rezıdentteri men ıntern-dárigerler arasynan rezerv quryldy, olardyń sany 450-ge jýyq. Jańa klınıkalardy kadrlarmen qamtamasyz etý úshin kadrlar resýrstaryn josparlaý jáne boljaý boıynsha jumystar júrgizilýde, jańadan qosylatyn ınfeksııalyq klınıkalardyń shtattyq kestesi eseptelýde. Mysaly, arnaıy áleýmettik qyzmet kórsetý ortalyǵynyń bazasynda jańadan ashylǵan 500 tósektik ınfeksııalyq stasıonardyń jumys isteýi úshin shtat kestesine sáıkes 587 shtat birligi qajet, búginde onyń kadrlarmen jaraqtanýy 70%-dy quraıdy. «Halyq Arena» bazasyndaǵy klınıkada 700-den astam medısına qyzmetkeri iriktelip alyndy.
Jańadan ári jedel salynyp jatqan modýldi stasıonarǵa 300 tósek-oryn, 280-ge jýyq medısına qyzmetkeri qajet. Búginde shtattyq keste jasalyp, kadrlyq rezerv arasynan mamandar iriktelýde. Qazirgi tańda medısınalyq uıymdarǵa reanımatolog, ınfeksıonıst, epıdemıolog, pýlmonolog sııaqty mamandar jetispeıdi.
Sonymen qatar qala ákiminiń málimeti boıynsha uıymdardyń materıaldyq-tehnıkalyq bazalary aıtarlyqtaı kúsheıtildi. Máselen, 52 ÝZI apparaty, 38 rentgen, 269 О́JT apparaty, 5 KT, 2 MRT apparaty satyp alyndy. Bularǵa qosa, kópsalaly medısınalyq tósekter, 250 tósek janyndaǵy monıtor, zerthanalyq qurylǵylardyń 43 birligi, 1050 ottegi konsentratory alyndy. Jedel járdem qyzmetiniń avtoparki 35 avtomashınaǵa jańardy, jyl sońyna deıin jedel járdemniń taǵy 100 kóligi alynatyn bolady. Birinshi eshelondaǵy segiz stasıonarǵa medısınalyq gazdyń 24 myń oryndyq ortalyqtandyrylǵan júıesi ornatylýda. 17 stasıonarda stoktardy zararsyzdandyrý, al 13-inde medqaldyqtardy ýtılızasııalaý júıeleri salynýda. B.Saǵyntaev múgedek jandarǵa áleýmettik qoldaý kórsetý, jumyspen qamtýdaǵy áleýmettik baǵdarlamalardy iske asyrý jáne qoljetimdi orta qurý jóninde qoıylǵan suraqtarǵa jaýap berdi. Turǵyndar budan ózge jylý maýsymynyń bastalýy, qoǵamdyq kólik, ınjenerlik ınfraqurylymdar men joldardyń salynýy týraly saýaldaryna jaýap aldy.
Tikeleı efırdiń aldyńǵy segiz baǵdarlamasy barysynda qala ákimi 129 suraqqa jaýap berdi. Sondaı-aq «Almaty» telearnasynyń Akimat Live baǵdarlamasynyń tikeleı efıri redaksııasyna túsken 226 suraqqa naqtyly jaýaptar berilip, olar atalǵan telearna saıtynda, «Vechernıı Almaty» jáne «Almaty aqshamy» gazetterinde jarııalandy.
ALMATY