Memleket basshysy Qasym-Jomart Toqaev óziniń halyqqa arnaǵan joldaýynda bilim men ǵylym salasyn damytýǵa erekshe den qoıyp keledi. Sonyń biri – pedagogıkalyq mamandyqtarǵa túsetin abıtýrıentterge qoıylatyn talaptardy arttyrý jáne stıpendııa mólsherin ulǵaıtý bolatyn, dep habarlaıdy Egemen.kz.
Prezıdenttiń bul tapsyrmasyn Shymkenttegi M.Áýezov atyndaǵy Ońtústik Qazaqstan ýnıversıteti alǵashqylardyń biri bolyp júzege asyrdy. Bul joǵary oqý ornynda bilim alatyn bolashaq pedagogter 42-48 myń teńge kóleminde stıpendııa ala bastaǵan.
Qazirgi tańda ýnıversıtette 4 myńǵa jýyq stýdent pedagogıkalyq mamandyqta bilim alady. Solardyń biri Janerke Dosbol. Ol fılologııa fakýltetiniń 2 kýrs stýdenti. Eki shet tili mamandyǵy boıynsha bilim alady.
"Ustazdar merekesi qarsańynda shákirtaqymyz eselene túskeni mamandyǵyma degen qurmetimdi odan saıyn joǵarlatty. Bul pedagog bolamyn degen jastarǵa stımýl", deıdi ol.
Aıta keteıik, elimizde maýsym aıynan bastap pedagogıkalyq mamandyqtarǵa túsý úshin shekti ball birden 70-ke deıin kóterilgen. Bıyl "Altyn belgi" tósbelgisi ıegerleriniń arasynda pedagogıkalyq mamandyqty tańdaǵandar sany 1,7 ese artqan. Sondaı-aq doktoranttardyń stıpendııasy 102 myńnan 150 myń teńgege deıin ósken. Mundaı shara jas ǵalymdardy qoldaý úshin óte mańyzdy.
"Kúni keshe ǵana telefonymyzǵa shákirtaqy jaıynda sms keldi.48 myń tústi dep. О́zim jaqsy oqımyn. Qatty qýandyq shynyna kelgende. Bul mamandyqty tańdaýda basty maqsatym, sanaly urpaqty tárbıeleýge ózimniń úlesimdi qosqym kelgen bolatyn. Kishkentaıymnan muǵalim bolýǵa bet buryp júrgenmin. Bizdiń mamandyqqa osyndaı memleket tarapynan qoldaý kórsetilip jatqanǵa biz stýdentter dán rızamyz", deıdi M.Áýezov atyndaǵy OQÝ 2 kýrs stýdenti Janerke Dosbol.
M.Áýezov atyndaǵy OQÝ rektory Darııa Qojamjarovanyń aıtýynsha atalǵan irgeli oqý ornynyń professor tobynyń jalaqysy da ósken.
"Prezıdentimizdiń joldaýyna sáıkes, biz M.Áýezov atyndaǵy ýnıversıtetiniń oqytýshy professor tobynyń jalaqysyn 30 paıyzǵa kóbeıttik. Al pedogogıkalyq mamandyqty tańdaǵan stýdentterimizdiń eki esege shákirtaqysy kóterildi. Budan balalarymyz óte yntalanyp, eekinshiden óziniń pedagog mártebesiniń bar ekendigin túsinip uǵynyp oqı otyryp jańa mamandyqtardy da ıgerýdi kózdep otyr", deıdi ýnıversıtet rektory.