Osakarov aýdanyndaǵy Kolhoznoe aýylynda turatyn Sergeı Saratovkın degen azamattyń bal jınaýmen aınalysyp júrgenine bes jyldyń júzi bolypty. Osy jyldar aralyǵynda mol tájirıbe jınaqtaǵan omartashy baldyń jańa túrlerin óndirýdi de durys jolǵa qoıa bilgen.
Jaqynda Sergeı baldyń asa sırek kezdesetin suryby – baldyrǵan balyn aldy. Aıta ketý kerek, baldyń bul túri aýyl sharýashylyǵynda elıtalyq ónim bolyp sanalady jáne mamandardyń aıtýynsha, onyń adam aǵzasyna degen paıdasy da shashetekten kórinedi.
– Baldyrǵan balyn alý úshin qolaıly klımat qajet. Bıyl bizde bári de sátimen kele qaldy: aptap ystyq ta, kúnniń kúrt salqyndaýy da boldy, sodan keıin jaýyn-shashyn jıi jaýyp turdy. Osynyń bári ósimdikterdiń qaýlap ósýine ıgi yqpalyn tıgizdi. Baldyrǵan gúldegen kezde meniń aralarym barlyǵy jeti flıaga bal jınady. Bul baldyń túsi qara bolady, emdik qasıetteri asa joǵary jáne ózi hosh ıisti keledi, – deıdi omartashy.
Qazir Sergeı Saratovkınniń baldyrǵan balyna degen suranys artyp, kásipkerdiń tasy órge domalap tur. Keleshekte ol kásibiniń aıasyn ulǵaıtyp, oblys turǵyndaryn baǵaly balmen keń kólemde qamtamasyz etýdiń joldaryn oılastyryp júr.
Qaraǵandy oblysy,
Osakarov aýdany