Qalanyń kúndelikti kúıki tirliginen bir sát arylyp, tabıǵattyń ǵajaıybyn, qudiretin sezingisi keletin jandarǵa arnalǵan zamanaýı IT-tehnologııamen jabdyqtalǵan «Borıs Sherbakovtyń jasyl úıi» esigin ashty.
«Jasyl úıdiń» Borıs Sherbakovtyń esimimen atalýynda úlken mán bar. Ol – ǵalym-ornıtolog, tabıǵat zertteýshi, qorshaǵan ortany qorǵaýǵa erekshe úles qosyp júrgen janashyr, saıahatshy, daryndy jazýshy, О́skemenniń jáne Vetnamnyń Hoshımın qalasynyń qurmetti azamaty.
Ǵalym-ornıtolog elimizde meken etetin 25 qustyń túrin anyqtaǵan. Birqatar qustyń qaıdan shyqqanyn, qus qanaty men qaýyrsynynyń qalaı paıda bolǵany týraly ǵalymnyń boljamy jaqynda álemdik deńgeıdegi jańalyqqa aınalýy múmkin.
Bireý biler, bireý bilmes. Borıs Sherbakovtyń bastamasymen Batys Altaı, Marqakól qoryqtary, Qulja jáne Tarbaǵataı qaýmaldary ashylyp, Tarhan jáne Rıdder aýmaǵyndaǵy aǵash kesý toqtatylǵan. Ǵalymnyń barlyq eńbekteri týǵan jer men eldi súıýge, ult qundylyqtaryn qadirleýge, tabıǵatty tanýǵa, qorǵaýǵa shaqyrady.
Búgingi tańda tabıǵattyń jyldan-jylǵa tozyp bara jatqany, adamdardyń qorshaǵan ortaǵa degen nemquraıly kózqarasy óte ózekti másele. Jobanyń túptep kelgendegi maqsaty da qalalyqtardy B.Sherbakovtyń jáne basqa da tabıǵat zertteýshi-jazýshylardyń eńbekteri arqyly tabıǵatty tanýǵa, qorshaǵan ortany qorǵaýǵa shaqyrý edi.
Jurtshylyqty jaqsylyqqa shaqyrar «Jasyl úı» tabıǵat janashyrlary bas qosatyn, ekologııalyq taqyryptarda túrli sharalar ótkizetin erekshe orynǵa aınalary anyq.
О́SKEMEN