Osy ýaqytqa deıin tat basqan qubyrdan sý alyp kelgen turǵyndardyń ótinish-aryzyna beıjaı qaraý múmkin bolmady. Jarty ǵasyrdan beri aýystyrylmaǵan qubyrlardyń tozyǵy ábden jetkeni anyq edi.
Sóıtip qubyrlardy jańartý úshin merdiger uıym anyqtalyp, bilek sybana iske kirisken. Jobanyń smetalyq quny 745,77 mln teńgege baǵalandy. Sý qubyry jelilerin jańartýmen aınalysqan «Esma HHI» JShS bıyl jumysty aıaqtap, halyqtyń ıgiligine tapsyrdy.
– Sý qubyrynyń jalpy uzyndyǵy 18,9 shaqyrymdy qurady. Qubyr tartý jumystary 2018 jyldyń qyrkúıeginen osy jyldyń sáýirine deıin sozyldy. Eń bastysy, halyq endi taza aýyz sýdy tutynyp otyr, – deıdi «Esma HHI» JShS basshysy Damır Qaırat.
Elý jyldan beri jóndeý kórmegen aýyz sý qubyrlary 215 úıge, mektepke, aýrýhanaǵa, meshitke jáne mádenıet úıine tartyldy. Turǵyndar da dán rıza.
Dál osyndaı jumystar Semeı qalasynyń Muqyr aýylynda da atqaryldy. Mundaǵy jumystarmen «DK Proekt» JShS merdigerlik uıymy aınalysty. Jobanyń smetalyq quny – 477,264 mln teńge.
О́tken jyly jobany júzege asyrýǵa 160 mln teńge bólinip, ıgerildi. 2020 jyly joba boıynsha jumystardy aıaqtaýǵa 317, 264 mln teńge baǵyttaldy. Bólingen qarajatqa turǵyn úılerge 20,8 shaqyrym jeli, eki sorǵy stansasy jáne sý tartý qurylystary salyndy.
Aıta ketý kerek, aýylda turǵyn úılerden bólek eki orta mektep, qos dárigerlik ambýlatorııa, veterınarlyq jáne feldsherlik pýnktter, memlekettik mekemeler, kásipkerlik qyzmet nysandary bar. Halyq osyǵan deıin tozyǵy jetip, apatty jaǵdaıda turǵan eki qudyqtan sý alyp otyrǵan. Aýyz sýǵa qatysty máseleler de oryn-ornymen sheshilip keledi.
Bıyl óńir turǵyndaryn aýyz sýmen qamtamasyz etý 91,5 paıyzǵa deıin artýy múmkin. 1 qyrkúıektegi málimetter boıynsha, oblys turǵyndarynyń 90,5 paıyzy ortalyqtandyrylǵan sýmen qamtylǵan. Aýyldyq eldi mekenderdi qamtý – 67,1 paıyz, ıaǵnı 689 aýyldyq eldi mekenniń 462-si aýyz sýmen qamtamasyz etilgen.
Shyǵys Qazaqstan oblysy