Búgin Úkimet otyrysynda Aýyl sharýashylyǵy mınıstri Saparhan Omarov ishki naryqty tolyqtaı qamtamasyz etý baǵytynda qus etin óndirý qýatyn qosymsha 171 myń tonnaǵa arttyrý qajettigin aıtty, dep habarlaıdy Egemen.kz.
"Qazir qus eti boıynsha óz óndirisimizdiń kólemi ishki naryq qajettiliginiń 58 paıyzyn ǵana jabady. Ishki naryqty tolyqtaı toltyrý úshin qus etin óndirý qýatyn qosymsha 171 myń tonnaǵa arttyrý qajet. Bul mindet jańa qus fabrıkalaryn iske qosý, sondaı-aq qus fabrıkalarynyń qoldanystaǵy qýattylyqtaryn keńeıtý esebinen 2023 jyldyń sońyna deıin iske asyrylatyn bolady. Otandyq óndiris esebinen qus eti ımporty kólemin qysqartý el ekonomıkasynda jyl saıyn shamamen 177 mln AQSh dollaryn nemese 77 mlrd teńgeni saqtap qalýǵa múmkindik beredi, olar qazir valıýtalyq túsim túrinde basqa elderge ketýde", - dedi Saparhan Omarov.
Onyń aıtýynsha, atalǵan mindetti oryndaý úshin jalpy qýaty 285 myń tonna qus etin óndiretin 19 qus fabrıkasy, onyń ishinde bıyl jalpy qýaty 70 myń tonna bolatyn 6 qus fabrıkasy, 2021 – 2023 jyldary jalpy qýaty 215 myń tonna bolatyn 13 qus fabrıkasy iske qosylatyn bolady. Bul ishki naryq qajettiligin tolyq kólemde qamtýǵa múmkindik beredi. Bul 13 ınvestısııalyq jobany iske asyrý úshin qosymsha 147 mlrd teńge, onyń ishinde 69 mlrd teńge kredıttik resýrstar qajet etiledi.
"Jobalardy tabysty iske asyrý úshin ınjenerlik ınfraqurylym júrgizýge qarajat bólý, qus etin óndirýdi sýbsıdııalaýǵa jáne ınvestısııalyq sýbsıdııalarǵa qarajat bólý, qus eti ımportyna arnalǵan tarıftik kvotalardy bólý tetigin óńdeýshi kásiporyndardyń paıdasyna ózgertý, azyq óndirý úshin jer bólý syndy máselelerdi jedel sheshý qajet", - dedi S. Omarov.
Budan soń, mınıstr otandyq sút ónimderiniń kólemi jaıynda sóz etti.
"Sút ónimderi boıynsha irimshik pen súzbe qoıýlandyrylǵan jáne qurǵaq sút boıynsha ımport kólemi bar. Sút shıkizatyna qaıta eseptegende sút ónimderiniń ımportynyń jalpy kólemi shamamen 500 myń tonnany quraıdy. Otandyq sút zaýyttary bul taýarlardy ózderi óndire alady. Oǵan qosa olardyń óndiristik qýaty tolyq júktelmegen. Sapaly sút taýarynyń shıkizat ónimderi kólemin ulǵaıtý máselesin sheshý qajet. Sondyqtan mınıstrlik orta merzimde perspıktıvada ónerkásiptik taýarlyq sút fermalaryn iske qosý jáne olardyń qýattylyqtaryn keńeıtý esebinen taýarlyq sút óndirisiniń ulǵaıtý mindetin alǵa qoıyp otyr", - dedi ol.