Elimizde ótken aıdyń basynda 24,2 mln uıaly baılanys abonenti boldy. Bul ótken jyldyń sáıkes kezeńindegi abonentter sanynan (25,9 mln abonent) 6,5%-ǵa az. Tutynýshylardyń 63,3 paıyzy ınternet jelisine qosylǵan. Finprom.kz-tiń aqparaty boıynsha bir jyl ishinde ınternet tarıfi 2,6%-ǵa, al uıaly baılanys qyzmeti 1,7%-ǵa qymbattap, 2,5 mln abonentke deıin qysqarǵan, dep habarlaıdy Egemen.kz
Qazaqstanda uıaly baılanys jáne ınternetke tirkelgen abonentter sanynyń azaıýyna qaramastan, baılanys qyzmetteriniń kólemi aıtarlyqtaı ósti. Mysaly, aǵymdaǵy jyldyń qańtar-tamyzynda elimizdiń telekommýnıkasııalyq kompanııalarynyń baılanys qyzmetinen alǵan kiristeri 8,3 paıyzǵa ulǵaıyp, 574,2 mlrd teńgeni qurady. О́tken jyly ol 519,9 mlrd teńge bolǵan edi. Kirister ósiminiń negizgi sebepteriniń biri − ınternet-provaıderler men uıaly baılanys operatorlary tarıfiniń kóterilýi.
Internet usyný qyzmeti salasyndaǵy telekommýnıkasııalyq kompanııalardyń kiristeri bir jyl ishinde 13,2%-ǵa ósti jáne 213,4 mlrd teńgege jetti. Bul telekommýnıkasııa naryǵyndaǵy qyzmetterdiń jalpy 37,2%-ǵa quraıdy. Sonymen qatar uıaly baılanys qyzmetteriniń kólemi ótken jyldyń sáıkes kezeńimen salystyrǵanda 1,5%-ǵa artyp, 151,7 mlrd teńgeni qurady. Sonyń ishinde halyqqa kórsetilgen uıaly baılanys qyzmetteri aqshalaı mánde bir jylda birden 5,1%-ǵa, ıaǵnı 108,1 mlrd teńgege deıin ósken.
Sondaı-aq óńirlik bóliniste baılanys qyzmetteri kóleminiń 80%-y Almaty men Nur-Sultan qalasyna tıesili. Ulttyq Ekonomıka mınıstrligine baǵynysty Statıstıka komıtetiniń málimetinshe, uıaly baılanys kólemi uıaly baılanys operatorlary tirkelgen mekenjaıy boıynsha bólingen. Máselen, Almatydaǵy baılanys qyzmetteriniń kólemi 336,6 mlrd teńge bolsa, al Nur-Sultanda 121 mlrd teńgeni quraıdy. Budan bólek, sektordaǵy qyzmet kórsetý kólemi boıynsha Qaraǵandy (13,8 mlrd teńge), Shyǵys Qazaqstan (13,2 mlrd) jáne Almaty (9,9 mlrd) oblystary kósh bastap tur.
Esterińizge sala keteıik, taıaýda Sıfrlyq damý, ınnovasııalar jáne aeroǵarysh ónerkásibi mınıstrligi uıaly baılanys qyzmetterin kórsetý qaǵıdalaryna ózgertýler engizdi. Endi mobıldi operatorlar abonentterge ózge tarıftik josparlarmen qatar, tólem bir kúntizbelik aıǵa jasalatyn tarıftik jospardy da usynýy tıis. Engizilgen ózgertýlerdiń arqasynda abonentter tarıftik josparlardyń ishinen ózine qajetin tańdaı otyryp, ony tolyq bir aı paıdalana alady. Mysaly, eger abonent tarıftik josparǵa aıdyń sońǵy kúni qosylsa, onyń jeke shotynan baılanys qyzmeti úshin tólem kelesi aıdyń sońǵy kúni shegeriledi.
Munymen qosa, erejege "bazalyq tarıftik jospar" uǵymy engizildi. Atalǵan tarıf abonenttik tólemdi talap etpeıdi, tek naqty paıdalanǵan mınýt nemese SMS sanyna ǵana tólem jasaı otyryp, qońyraý shalýǵa jáne SMS jiberýge múmkindik beredi. "Bazalyq tarıftik jospar" abonent nómirdi basqa uıaly baılanys operatorynyń jelisine aýystyrǵanda (MNP qyzmeti), jańa tarıftik jospardy tańdap úlgermegende, sondaı-aq qoldanystaǵy tarıftik jospar áreket etýin toqtatqan jaǵdaıda ǵana qosylady.
Aıtalyq, buǵan deıin uıaly baılanys operatory abonentte qandaı da bir tarıftik jospar bolmasa, ony ózderi abonenttiń kelisiminsiz kez kelgen tarıftik josparǵa qosa alatyn. Endi olar ózgeristi jylyna bir ret qana engize alady jáne bul týraly abonentti naqty ózgeristerge deıin kúntizbelik otyz kún buryn habardar etýge mindetti.
"Qazaqtelekom" AQ 2019 jyldyń 1 qańtarynan bastap 3499 teńgege jańa "Bastapqy" pakettik tarıftik jospary engizildi. Bul toptama qoldanystaǵy eń tómengi tarıftik jospardan (3 550 teńge) 5,5% tómen jáne oǵan 10 Mbıt/s deıingi jyldamdyqpen Internet qyzmetteri jáne Qazaqstan boıynsha lımıtsiz qońyraýlarmen telefon baılanysy men Altel/Tele2 jelisine qońyraý sholý kiredi.
Al "Qaztranskom" AQ abonentti baılanys qyzmetterine qosý boıynsha jumystardy júrgizýge 50% jeńildik, sondaı-aq telefonnyń abonenttik tólemine aı saıynǵy 10% jeńildik jáne ınternet qyzmetteriniń abonenttik tólemine 15% jeńildik usynady. "Transtelekom" AQ UOS qatysýshylary men múgedekteri jáne olarǵa teńestirilgen tulǵalar úshin ınternet jelisine qatynaý qyzmetine 5% jeńildik usynady.
"Kar-Tel" JShS jańa "Áleýmettik", "Áleýmettik plıýs" tarıftik josparlarynyń jelisi jáne "Muǵalimder men oqýshylarǵa arnalǵan" tarıftik jospary ázirlendi. Tarıftik jospar boıynsha abonentter uıaly baılanys qyzmetterin aıtarlyqtaı tómendetilgen baǵamen (590 teńgeden bastap) alady.
Sonymen birge "Erekshe" TK "Ksell" AQ-da "Ksell" abonentteri úshin qazir de qoljetimdi bolmaq. Tarıftik jospar boıynsha 1 jáne 2 top múgedekteri men estý qabileti nashar múgedekter jeli ishinde 1 teńgeden, basqa operatorlardyń jelisine 9 teńgeden, basqa operatorlardyń jelisine 1 SMS úshin 2 teńgeden shyǵys baılanys alady.
Aıtylǵan máseleler álemdik minberde de sheshimin taptaı keledi. Sebebi jahandy jaýlaǵan pandemııanyń áseri roýmıngtik baılanysqa da zardabyn tıgizýde. Roýmıngti tutynýshylar sanynyń ósýine qaramastan, operatorlar halyqaralyq roýmıngten josparlanǵan kiristi jyl sońyna deıin qalpyna keltirgisi joq.