"Astana" Prezıdenttik kásibı sport klýbyna kiretin sport klýbtaryn qarjylandyrý tártibi ózgerdi. Bul týraly "Samruk-Kazyna Trust" Áleýmettik jobalardy damytý qory bas dırektorynyń orynbasary Asqar Batalov onlaın brıfıngte málimdedi, dep habarlaıdy Egemen.kz.
"Samuryq-Qazyna" UÁQ "Astana" Prezıdenttik sport klýbyn taratý týraly sheshim qabyldady. Klýbtarǵa qatysty barlyq quqyqtar men mindettemeler endi "Samruk-Kazyna Trust" qoryna ótedi. Endi ol sport klýbtarynyń quryltaıshysy bolady. Bul sheshim kóp deńgeıli eseptilikti boldyrmaý, sondaı-aq ákimshilik-basqarý personalyn ustaýǵa qosymsha shyǵyndardy boldyrmaý maqsatynda qabyldanǵan.
"Astana" fýtbol klýby, "Astana" basketbol klýby, "Barys" hokkeı klýby jáne "Astana Pro Team" kásibı velokomandasy óz jumysyn jalǵastyra beredi, sport klýbtary "Samuryq-Qazyna" qorynan tikeleı qarjylandyrylatyn bolady.
Taratylatyn PKSK eks-basshysy Asqar Batalov "Samruk-Kazyna Trust" qory bas dırektorynyń sport máseleleri jónindegi orynbasary retinde qyzmetin qadaǵalaýdy jalǵastyrady.
"Maqsat - kóp deńgeıli esep berý jáne qarjylyq qyzmetti, sondaı-aq ákimshilik-basqarý ujymyn ustaýǵa qosymsha shyǵyndardy boldyrmaý", dep atap ótti Asqar Batalov onlaın brıfıngte.
Esterińizge sala keteıik, "Astana" PKSK 2012 jyly sportqa memlekettik qoldaýdy kúsheıtý, Qazaqstan men onyń astanasynyń álemdik arenadaǵy oń ımıdjin nyǵaıtý, salaýatty ómir saltyn nasıhattaýǵa jáne joǵary sporttyq jetistikterdi damytýǵa yqpal etý maqsatynda qurylǵan bolatyn.