Kún raıynyń salqyndaýyna baılanysty Oral qalasynda jylý berile bastady. 5 qazanda Oralda koronavırýsqa qarsy kúres jónindegi oblystyq jedel shtabtyń kezekti otyrysy bolǵan edi. Osy jıynda bıylǵy jylytý maýsymyna nysandardyń daıyndyǵy, kommýnaldyq mekemelerdiń maýsymǵa jasaǵan esebi tyńdaldy.
– Qazirdiń ózinde qaladaǵy densaýlyq saqtaý, bilim berý jáne mádenıet nysandary jylytý maýsymyna tolyq daıyn. Al kóppáterli turǵyn úılerdiń daıyndyǵy 92 paıyz bolyp tur. Kún raıy kúrt salqyndap ketkendikten Oral men Aqsaı qalalaryna 5 qazannan bastap jylý berý jóninde sheshim qabyldandy, – dedi «Jaıyqjylýqýat» AQ bas dırektory Qýat Mýsın.
Alaıda Oral qalasyndaǵy kópqabatty turǵyn úıler jylýmen tolyq qamtylǵan joq. Qýat Naýryzulynyń aıtýynsha, jylý shaharǵa túgel taraǵansha 2-3 kún ýaqyt kerek. Qazir trassadaǵy jylýdyń ortasha temperatýrasy 65-70 gradýs. Birer kúnde 90 gradýsqa jetýi qajet.
Jylytý maýsymy bastalǵanǵa deıin qaladaǵy kópqabatty turǵyn úılerge qyzmet kórsetetin páter ıeleri kooperatıvteri óz aýmaǵyndaǵy úılerdiń maýsymǵa daıyndyǵy jóninde qujat tapsyrýy kerek bolatyn. Biraq mundaı tólqujat jasalmaǵan úıler de bar.
– О́z isine jaýapkershiliksiz qarap jatqan páter ıeleri kooperatıvteri de bar. Biraq olarǵa hat joldap, shuǵyl túrde, bir-eki kún ishinde daıyndyq qujatyn tapsyrý jóninde talap qoıdyq, – deıdi Oral qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Jandos Dúısenǵalıev.
«Jylý berýge daıynbyz» dep otyrǵan kommýnaldyq mekemelerdiń óz basynda da sheshilmeı kele jatqan másele az emes. Onyń eń bastysy – turǵyndardyń tutynǵan qyzmet boıynsha bereshegi. Máselen oraldyqtar buǵan deıin paıdalanylǵan qyzmet úshin «Jaıyqjylýqýat» mekemesine 350 mln teńgeden astam qarjy bereshek eken. «Batyssýarnasy» mekemesiniń de turǵyndardan 200 mln teńgeden asa alashaǵy bar.
– Qazirgi ýaqytta kommýnaldyq kásiporyndar bereshek kólemin azaıtý boıynsha óz jumysyn jasaýda, – deıdi Q.Mýsın.
Batys Qazaqstan oblysy