"Nur Otan" partııasy Soltústik Qazaqstan oblystyq fılıalynyń tóraǵasy Qumar Aqsaqalov Petropavl qalalyq fılıalynyń partııa ishindegi irikteýge qatysýshylarmen kezdesti. Ol belsendi qatysýshylarǵa alǵys hattar men gramotalar tabys etti, dep habarlaıdy Egemen.kz.
Soltústik Qazaqstan oblysynda praımerızge 632 adam qatysty, olar bir aı boıy úgit naýqany barysynda óńirdegi áleýmettik-ekonomıkalyq jaǵdaıdyń jaqsarǵany týraly óz oılaryn aıtty. Petropavlda 106 úmitker tirkeldi. Oblys boıynsha úmitkerler saılaýshylarmen 6 500 – ge jýyq kezdesý ótkizip, 123 500 adam qamtyldy, oblys ortalyǵynda 700-den astam kezdesý ótti. Kezdesýler barysynda úmitkerler partııa múshelerinen 1200-ge jýyq tapsyrystar jınady.
Qumar Aqsaqalov atap ótkendeı, halyqty tolǵandyratyn taqyryptarǵa TOP-5 máselelerge turǵyn úıdiń qoljetimdiligi, joldardy jóndeý, áleýmettik qoldaý, sondaı-aq densaýlyq saqtaý jáne bilim berý deńgeıin arttyrý máseleleri kirdi. Barlyq aıtylǵan máseleler men usynystar partııanyń saılaýaldy baǵdarlamasynda kórinis tabady.
"Árıne, árkimniń óz úmiti boldy. Bireý jeńiske qýanady, bireý osy kezeńde alǵa qoıǵan maqsattaryna jete almady. Jalpy, meniń oıymsha, munda jeńimpazdar men jeńilgender joq. Barlyǵy jeńdi. Sizder úshin praımerız synaqtyń bir túri boldy. Sizderdiń árqaısyńyzǵa belsendilikterińiz ben jemisti jumystaryńyz úshin alǵys aıtqym keledi", - dedi partııa aımaqtyq fılıalynyń tóraǵasy.
"Nur Otan" partııasy Petropavl qalalyq fılıalynyń 100-ge jýyq praımerız qatysýshylary alǵys hattarmen marapattaldy. Úzdik shyqqan úmitkerler jeti arnaıy nomınasııa boıynsha gramotalarmen marapattaldy. Daýys berý kúnderi praımerızge qatysýshylar úshin partııa músheleriniń 91,2% óz daýystaryn berdi. Onlaın daýys berýdi 18 myńnan astam adam paıdalandy. Bıýlletender arqyly óńirdiń 7,5 myń nurotandyq daýys berdi.