Almatydaǵy ál-Farabı atyndaǵy Qazaq Ulttyq ýnıversıtetindegi «Geoenergetıka» ortalyǵy bazasy negizinde Qazaq-fransýz ǵylym, tehnologııa jáne energetıka ınstıtýty qurylady. Bul týraly qazaqstandyq jetekshi JOO rektory Ǵalym Mutanov pen Fransııa Respýblıkasynyń Qazaqstandaǵy Tótenshe jáne О́kiletti Elshisi Fılıpp Martıne ekijaqty kezdesý barysynda kelisti, dep habarlaıdy Egemen.kz.
Qazirgi ýaqytta QazUÝ-da «Geo-Energetıka» ortalyǵy tabysty jumys isteıdi, ol 2010 jyly Fransııa men Qazaqstan arasyndaǵy strategııalyq áriptestik týraly shart aıasynda quryldy. Osy ýaqyt aralyǵynda birlesken bilim berý baǵdarlamalary boıynsha «Esepteý tehnıkasy jáne baǵdarlamalyq qamtamasyz etý», «Informatıka» jáne «Mehanıka» mamandyqtary boıynsha 100-den astam magıstrant jáne 20-dan astam doktorant daıyndaldy.
Kezdesý jáne ǵylymı-bilim berý yntymaqtastyǵyn damytý máselelerin talqylaý barysynda fransýz tarapy «Geo-Energetıka» ortalyǵynyń negizinde Qazaqstan-Fransýz ǵylym, tehnologııalar jáne energetıka birlesken ınstıtýtyn qurý týraly bastama kóterdi. QazUÝ rektory Ǵ. Mutanov úlken qyzyǵýshylyq tanytyp, aýqymdy jobany júzege asyrýǵa atsalysýǵa daıyn ekendigin bildirdi.
Instıtýttyń ashylýy QazUÝ men Fransııa ýnıversıtetteri arasyndaǵy yntymaqtastyqty keńeıtýge múmkindik beredi. Qazirgi ýaqytta Lotarıngııa ýnıversıtetimen jáne Shampan-Ardenn Reıms ýnıversıtetimen seriktestikte munaı-gaz isi, energetıka, matematıka jáne mehanıka mamandyqtary boıynsha tórt birlesken eki dıplomdy magıstrlik baǵdarlamalar ázirlendi. Sondaı-aq, QazUÝ stýdentteri Fransııada oqyp, kásibı taǵylymdamadan ótip qana qoımaı, fransýz tiliniń qarqyndy kýrstarynan ótýge múmkindik alady.
Kezdesý sońynda Elshi Fılıpp Martıne Fransııa men Qazaqstan ýnıversıtetteri arasyndaǵy ǵylymı-bilim berý jáne mádenı baılanystardy damytýǵa qosqan zor úlesi úshin ál-Farabı atyndaǵy QazUÝ-dyń altyn medalimen marapattaldy.