Jýyrda aqyn, ánshi-sazger Elena Ábdihalyqovanyń «Meniń jalǵyz juldyzym» atty jyr jınaǵy men «Saǵynysh-ǵumyr» atty án jınaǵy jaryq kórdi.
Jyr kitabynda aqynnyń óleńderi hám qazaqtyń ardaqty qalamgerleri Ábish Kekilbaev, Farıza Ońǵarsynova týraly maqalalary berilgen. Al partıtýralar jınaǵyna avtordyń ár jyldary jazǵan tańdamaly ánderiniń estradalyq-sımfonııalyq orkestrge arnalǵan partıtýralary men notalary engizilipti.
«Profı Medıa» baspasynan árqaısysy 2000 danamen basylyp shyqqan qos kitap Mańǵystaý oblysynyń ákimi Serikbaı О́telgenuly Trumovtyń qoldaýymen jarııalanyp otyr.
Talantty sazger án kitabyna jazǵan alǵy sózinde: «...Meniń ǵumyrym – Saǵynysh. Kimdi?.. Neni?.. Ne úshin?.. Bilmeımin. Biraq keýdemdi únemi saǵynysh kerneıdi de turady...
Sol saǵynyshtarymnyń saz-únin osy kitap jetkizgeı...» deıdi. Avtordyń saǵynyshqa toly sazdy áýenderi ár qazaqtyń júrek túkpirinde saqtalǵan.
Aqyn shyǵarmashylyǵyna zor tabys tileımiz.