QR Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tapsyrmasy boıynsha oqıǵa ornyna Qazaq qurylys jáne sáýlet ǵylymı-zertteý jáne jobalaý ınstıtýtynyń ("QazQSǴZI" AQ) mamandary is-saparmen jiberildi, dep habarlaıdy Egemen.kz.
Mamandar Uıǵyr aýdanynyń Shonjy aýylyndaǵy qulaǵan dene shynyqtyrý-saýyqtyrý keshenin jedel tekserýdi aıaqtap, onyń bastapqy sebepterin anyqtady. Onyń nátıjeleri boıynsha apat "9" jáne "10" osteri boıynsha fermalarda bastalǵany anyqtaldy. Apat jaılastyrylatyn sement-qum tutastyrǵynyń belgilengen jobalyq mánderinen asyp ketken júktemelerinen týyndaǵan. Bul rette jartylaı fermalardyń joǵarǵy jáne tómengi beldikteriniń qosylystarynyń montajdyq túıinderi jobadan aýytqý bolyp sanalatyn ártúrli kólemdegi alty burandamamen oryndalǵan.
Tik júktemeler kezinde fermalardyń montajdyq túıinderi tarala bastady, bul bir burandamanyń buzylýyna jáne kóldeneń júktemelerdiń fermalardan baǵandarǵa berilýine jáne 3-blok konstrýksııalarynyń birtindep qulaýyna ákeldi. Osylaısha, 3-bloktaǵy apattyń sebepteriniń biri bekitilgen jobalaý sheshimderinen aýytqý dep sanaýǵa bolady.
Komıtet Almaty oblysynyń ákimdigine Qazaqstan Respýblıkasynyń qoldanystaǵy zańnamasynyń buzylýyna jol bergen tulǵalardy (merdiger, tehnıkalyq jáne avtorlyq qadaǵalaý)jaýapkershilikke tartý týraly tıisti hat joldady.
Sonymen qatar, jobalaý qujattamasynda baǵandarmen qosylý túıinderi keltirilmegen jáne fermalardyń tirek taǵandarynyń qurylymy sıpattalmaǵan, 2-blokqa janasatyn jerde 3-blok jabynynyń deńgeıinde deformasııalyq jikterdi ornatý boıynsha sheshimder keltirilmegen. Osyǵan baılanysty jobalyq qateler joqqa shyǵarylmaıdy.
Apattyń sebepteri týraly túpkilikti tujyrymdar bloktyń tirek konstrýksııalarynyń elementterinen iriktep alynǵan úlgilerdi esepteý jáne zerthanalyq synaý nátıjeleri negizinde jasalady.
Shonjy aýylyndaǵy dene shynyqtyrý-saýyqtyrý kesheniniń úshinshi blogynyń (sportzalynyń) jumsaq jabynyn ornatý jumystary kezinde metall konstrýksııalarynyń qulaýy 21 qyrkúıek kúni saǵat 11.00-de oryn aldy. Qulaǵan bloktyń aýdany 1058,4 sharshy metrdi qurady. Ǵımarattyń birinshi jáne ekinshi bloktaryna áser etken joq. Qaza bolǵandar men zardap shekkender joq. ALMATY