Nur-Sultanda sýmen jabdyqtaý tarıfi qymbattamaıdy. Bul týraly Tabıǵı monopolııalardy retteý komıtetiniń Nur-Sultan qalasyndaǵy departamenti aıtyp ótti, dep habarlaıdy Egemen.kz
Departamenttiń habarlaýynsha, birqatar BAQ-ta sýmen jabdyqtaý tarıfteri 300%-ǵa ósetini týraly aqparat taraǵan.
"QR UEM Tabıǵı monopolııalardy retteý komıtetiniń Nur-Sultan qalasy boıynsha departamenti 2020 jyldyń 25 maýsymynda "Astana Sý Arnasy" ShJQ MKK-ǵa ótinim bergen. Naqtyraq aıtqanda 2021-2025 jyldarǵa arnalǵan sýmen jabdyqtaý jáne sý burý boıynsha rettelip kórsetiletin qyzmetterge tarıfter men tarıftik smetanyń shekti deńgeılerin bekitýge ótinim joldanǵan", deıdi departament ókilderi.
6 qazanda departament "Astana Sý Arnasy" ShJQ MKK ótinimi boıynsha ashyq jınalys nysanyndaǵy tarıf jobasyn talqylaý boıynsha jarııa tyńdaý ótkizgen. Oǵan máslıhat depýtattary, qoǵamdyq birlestikterdiń ókilderi men táýelsiz sarapshylar qatysqan.
Jıynda "Astana Sý Arnasy" kásipornynyń ókilderi sýmen jabdyqtaý boıynsha tarıfti 44%-ǵa, sý burý boıynsha tarıfti 137%-ǵa kóterý týraly kásiporynnyń tarıftik jobasyn tanystyrǵan.
"Bul rette usynylǵan ótinim – tarıf jobasy ekenin atap ótý qajet. Departament kásiporyn málimdegen shyǵyndardyń barlyq baptarynyń negizdiligine jáne tabıǵı monopolııalar týraly zańnama talaptaryna sáıkestigine egjeı-tegjeıli taldaý júrgizedi. Osyǵan baılanysty tarıftiń kóteriletini týraly naqty málimet shynaıy aqparatqa janaspaıdy", delingen habarlamada.