Batys Qazaqstan oblysynyń Bórli aýdanyna qarasty Bórli aýylynda aýyl týrızmin, ekologııalyq týrızmdi damytý boıynsha semınar-trenıng ótti. Trenıngke oblystyń ár óńirinen 40-tan asa yntaly jandar qatysty, dep habarlaıdy Egemen.kz.
Qazaqstan týrıstik qaýymdastyǵynyń ókili, Ekotýrıstik aqparattyq-resýrstyq ortalyǵynyń úılestirýshisi Alına Dáýletbaqovany Almaty qalasynan arnaıy shaqyrǵan – Bórli aýdanynyń ákimdigi eken.
"Búgingi semınar-trenıngte týrısterge qonaqjaılyq úı qyzmetin kórsetetin aýyl turǵyndaryna óte paıdaly keńester aıtyldy. Sonyń ishinde Almaty oblysyna qarasty Kólsaı kólderin tamashalaýshy týrısterge tıimdi qyzmet kórsetip, paıdaǵa kenelip júrgen Saty aýylynyń tájirıbesi talqylandy. Qonaq qabyldaıtyn úıge qoıylatyn talaptar, qyzmet sapasy, tamaq máziri, baǵa saıasaty sekildi naqty keńester semınarǵa qatysýshy aýyl turǵyndary úshin óte mańyzdy boldy dep oılaımyn", deıdi osy sharany uıymdastyrýshy Ǵylymı zertteýlerdi qoldaý qorynyń jetekshisi Aıbolat Qurymbaev.
Elimizde sońǵy jyldary týrızm salasyn damytýǵa erekshe mán berilýde. Bıylǵy qyrkúıek aıynda Qazaqstan halqyna joldaýynda Prezıdent Qasym-Jomart Toqaev "El ishindegi ekologııalyq týrızm mádenıetin barynsha damytý – óte mańyzdy is" degen bolatyn.
Semınarda "Qonaqjaı úı jáne onyń sapa standarttary", "Týrıstke barynsha djaıly bolý úshin ne kerek?", "Taǵam men sýsyn, ústel jasaýy, dastarhan máziri", "Qonaq kútýdiń eń kerekti talaptary", "Mázirdi esepteý, baǵasyn qoıý", "Týrıstik taǵamdardyń jańa túrin tabý" jáne basqa taqyryptarda qyzyqty sabaqtar ótti. Ásirese aýyl týrızminde keńinen qoldanylatyn tabıǵı ónimder, ulttyq-tarıhı turmys-salt daǵdylary, ár aýyldyń ózine tán erekshelikterin tıimdi paıdalanýǵa qatysty naqty aqyl-keńes berildi.
Batys Qazaqstan oblysynda týrızm salasyn damytý maqsatynda jarǵaq qulaǵy jastyqqa tımeı júrgen Aıbolat Shamuratuly dál osyndaı semınardy Bókeı Orda aýdanyndaǵy Han Ordasy aýylynda, Terekti aýdanyndaǵy Saryómir aýylynda ótkizýge usynys tastaǵan eken. О́kinishke qaraı aýdan basshylary tarapynan qoldaý tappaǵan.
"Biz Qazaqstan týrıstik qaýymdastyǵymen birge shalǵaı aýyldarda shaǵyn jáne orta bıznesti damytyp, álemde keń taraǵan Community Based Tourism (SVT) júıesinde paıda tabýǵa baýlyǵymyz keledi. Bul iste týrıske qyzmet kórsetý mádenıeti, óńirdiń ulttyq dástúri men dastarhan mázirin kórkem túrde usyna bilý óte mańyzdy. Búgingi semınar-trenıng aýyl turǵyndaryn osyǵan úıretedi", deıdi Aıbolat Qurymbaev.
Bórlide ótken semınar qorytyndysynda ózara áriptestik jóninde kelisim-sharttarǵa qol qoıylyp, Bórli aýdanynda ishki týrızmdi damytý, birlesken is-sharalardy uıymdastyrý týraly ýaǵdalastyq jasaldy.
Batys Qazaqstan oblysy