Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyn iske asyrý aıasynda bólingen granttar men shaǵyn nesıeler arqyly Aqmola oblysynyń turǵyndary tabysty túrde bıznes bastaýda.
Máselen, Shortandy aýylyndaǵy úsh balanyń anasy Mádına Qalıbekova «Bastaý Bıznes» jobasy boıynsha oqýdan ótken soń grant alyp, kókónis sata bastady.
«Meniń kúıeýim dáriger, jumysyna baılanysty osynda kóship keldik. Úıde biraz otyryp qaldym. Sodan keıin joldasym maǵan osy joba týraly aıtty. Jazda oqýdan ótip, sertıfıkat pen oǵan qosa grant aldym. Birneshe aı buryn azyq-túlik dúkenin ashtyq. Jaqynda bıznesti keńeıtý úshin taǵy da nesıe alýǵa tyrysyp kórýge bolatynyn bildim. Baıqap kóremin, sebebi josparlarym bar», deıdi Mádına Qalıbekova.
Al Sofıevka aýyldyq okrýginde turatyn kópbalaly ana Ábilhan Nurshash kásipkerlikti damytýdyń basqa baǵytyn tańdady. Ol mal sharýashylyǵyn damytý úshin nesıe aldy. Qazir onyń sharýashylyǵynda 15 bas iri qara mal bar.
«Qyrkúıek aıyndaǵy jaǵdaı boıynsha «Eńbek» baǵdarlamasy aıasynda kásipkerlik qyzmetti damytýǵa 486 shaǵyn nesıe jáne 540 grant berildi. «Bastaý Bıznes» jobasy aıasynda 1 120 adam kásipkerlik negizderin úırendi», dedi Aqmola oblysy jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova.
Basqarmanyń málimetinshe, oblysta 14 myńnan astam adam «Eńbek» baǵdarlamasynyń qatysýshysy boldy. 10 myń adam eńbekpen qamtyldy, onyń 6,6 myńy turaqty jumysqa, áleýmettik jumys oryndaryna – 490 jáne qoǵamdyq jumystarǵa 2 884 adam ornalasty. 786 qazaqstandyq jastar tájirıbesine joldandy. Qysqamerzimdi kásiptik oqýǵa 702 adam tartyldy, al 1 qyrkúıekten bastap oblysta 9-11 synyptardyń 1 190 túlegi tehnıkalyq jáne kásibı orta bilim oryndarynda oqýdy bastady.
Jalpy elimiz boıynsha osy jyly «Eńbek» baǵdarlamasyna 430 myń adam qatysyp, olarǵa túrli qoldaý sharalary kórsetildi. 279,8 myń adam jumyspen qamtylsa, onyń ishinde 146,7 myń adam turaqty jumysqa kirdi. 159,8 myń adam sýbsıdııalanatyn jumys oryndarymen qamtyldy. Bıznes-ıdeıalardy damytýǵa 6,9 myń mıkrokredıt jáne 20 myń qaıtarymsyz grant berildi. 30 myń azamat kásipkerlik negizderine qysqamerzimdi oqýdan ótýde.