Qazaqstan ulttyq quramasynyń bas jattyqtyrýshysy Mıhal Bılek Ulttar lıgasynda Belarýspen ótetin oıynynyń aldynda baspasóz máslıhatyna qatysyp, jergilikti buqaralyq aqparat quraldarynyń suraqtaryna jaýap berdi.
– Mıhal, kóptegen oıynshy ártúrli sebeppen oıynǵa qatysa almaıdy. Tájirıbeli ortalyq qorǵaýshy Iýrıı Logvınenkony shaqyrmaı, Sultan Ábilǵazyǵa tańdaý jasadyńyz. Nelikten?
– Sultan – senimdi oıyn kórsetetin jas fýtbolshy. Ol jaqsy qyrynan tanylyp, komandanyń basty qorǵaýshylarynyń biri bola bastady. Logvınenko uzaq ýaqyt boıy jaraqatyna baılanysty oınamaı, qalpyna endi kele bastady. Onyń sapaly ári tájirıbeli qorǵaýshy ekenin bilemiz. Sonymen qatar otbasy jaǵdaıyna baılanysty Maksım Fedın Mınskige kele almady.
– Belarýs quramasynyń jankúıerleri stadıonǵa kiretini belgili boldy. Jankúıerlerdiń stadıonǵa oralýy úlken mereke ekeni ras. Biraq jankúıerlerdiń stadıonda bolýy komandańyz úshin qıyndyq týdyrmaı ma?
– Qazaqstan chempıonatynyń oıyndary jankúıerlersiz ótedi. Árıne, fýtbolshylar jankúıerler úshin oınaıdy. Sol sebepti jankúıerlerdiń stadıonǵa oralýy – úlken mereke. Oıynǵa keletin bolsaq, qıyn kezdesý kútip tur. Qarsylastyń oıynyn jaqsy zerdeledik. Eki komanda da tek jeńis úshin oınaıdy.
– Ataqty bapker Arsen Venger jaqynda Ulttar lıgasynyń paıdasy joq ekenin málimdedi. Sizdiń oıyńyz qandaı?
– Qazaqstanda uzaq ýaqyt boıy komandalardyń oıyn tájirıbesi bolmady. Sondyqtan Ulttar lıgasynyń matchtary – halyqaralyq deńgeıde myqty qarsylastarmen básekelesýge jaqsy múmkindik. Mańyzdy týrnır dep sanaımyn.