Qazaq ulttyq qyzdar pedagogıkalyq ýnıversıteti daıarlaǵan túlekter ýaqyt talabyna saı ma? Jas mamandardyń zamanaýı bilim berýge daıyndyǵy qanshalyqty deńgeıde? Osy jáne ózge de saýaldarǵa jaýap izdeý maqsatynda ýnıversıtet oqytýshylary men elimizdegi bilim berý salasy qyzmetkerleriniń qatysýymen keńes ótti, dep habarlaıdy Egemen.kz
Fızıka kafedrasy uıytqy bolǵan shara TEDx onlaın-alańynda uıymdastyryldy.
Jıyn qatysýshylary Tórtinshi ónerkásiptik revolıýsııa jaǵdaıynda pedagogıkalyq joǵary oqý oryndarynyń túlekteri bilim berý uıymdarynyń suranysyn qanshalyqty qanaǵattandyrady degen saýal tóńireginde ózara pikir almasyp, tyń oılarymen bólisti.
"Qazirgi kúnde álem Tórtinshi ónerkásiptik revolıýsııa dáýirine, tehnologııalyq, ekonomıkalyq jáne áleýmettik salalardaǵy tereń jáne qarqyndy ózgerister kezeńine qadam basyp keledi. Bul – jumysshylardyń jáne jas mamandardyń bilimi men quzyrettiligine qoıylatyn talaptardy kúsheıtedi. Jańa tehnologııalyq úderister qalyptasqan jumys tásilderin, dúnıetanymdy, balalarymyzdy qalaı tárbıeleıtinimizdi jáne túrli sala mamandaryn daıarlaýdy túbegeıli ózgertýde", dedi basqosý moderatory, pedagogıka ǵylymdarynyń kandıdaty Názıra Sándibaeva.
Onyń paıymdaýynsha, Indýstrııa 4.0 – bul sıfrlyq tehnologııalar fızıkalyq prosesterdi naqty ýaqyt rejıminde baqylaýǵa, óz betinshe sheshim qabyldaýǵa jáne zamanaýı mashınalardyń adamdar arasyndaǵy ózara árekettesýin basqarýǵa múmkindik beredi.
Sonymen qatar basqosýda "Rýhanı jańǵyrý" baǵdarlamasy aıasynda ulttyq biregeılikti saqtaý, ulttyq tárbıe men sanaly oqytýdy kiriktire otyryp, bolashaq maman daıarlaýdyń mańyzdylyǵy da jan-jaqty qaýzaldy. Bul týraly Qyzdar ýnıversıtetiniń "Rýhanı jańǵyrý" Jobalyq keńsesiniń qyzmetkeri Gaýhar Baıtasheva men Fızıka, matematıka jáne sıfrlyq tehnologııalar joǵary mektebiniń dekany Gúlnaz Salǵaraeva sóz qozǵady.
Al Túrkistan, Mańǵystaý jáne Almaty oblystyq bilim berý salasynyń qyzmetkerleri zamanaýı jańa tehnologııalar arqyly bilim berýdiń mańyzdylyǵy jaıynda baıandady.
"Elbasy Nursultan Nazarbaevtyń "Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri" atty Qazaqstan halqyna Joldaýynda pedagogtardy oqytý jáne olardyń biliktiligin arttyrý joldaryn qaıta qaraý kerektigi aıtylǵan bolatyn. Ol úshin elimizdiń ýnıversıtetterindegi pedagogıkalyq kafedralar men fakýltetterdi damytý qajettiligi men bilim berýdiń barlyq deńgeıinde matematıka jáne jaratylystaný ǵylymdaryn oqytý sapasyn kúsheıtýge jete nazar aýdarylǵan bolatyn. Jastardyń jańa tehnologııalyq qalypqa daıyndaýdyń mańyzdy sharty bolyp tabylatyn buny iske asyrý oraıynda birqatar ister qolǵa alynǵany da ras. Bolashaq bilim berýdiń basty mindeti –bilim berý uıymdary, ásirese mektepter ýaqyt talaptaryna laıyqty bolý úshin tehnologııalyq progress pen adamı kapıtaldy birtutastandyrý. Sapaly maman daıarlaý isine jete kóńil bólinse, bolashaq ult tárbıeshileriniń bilimi men biligin arttyrýǵa nazar aýdarylsa bul mindet tolyq oryndalady dep oılaımyz", dedi jıyn qatysýshylary.
Shara barysynda Almaty oblysynyń Eńbekshiqazaq aýdanyndaǵy mektepterdegi robototehnıkany damytý oraıynda júzege asyrylyp jatqan jumystar da aıtyldy. О́z kezeginde atalǵan óńirdegi bilim berý uıymdarynyń basshylary Qyzdar ýnıversıtetindegi Robototehnıka oqý zerthanasymen tájirıbe almasýǵa nıetti ekendigin jetkizdi. Aldaǵy ýaqytta oqý ornynyń stýdentteri men oqytýshylary kásibı baǵdar berý jumysy aıasynda aımaqtaǵy mektep oqýshylaryn sandyq tehnologııalar men robototehnıkanyń meńgerý boıynsha ádistemelik kómek kórsetpek.