Atyraýǵa da shetelderden qatynaıtyn halyqaralyq áýe reısteri bar. Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetine súıensek, munaıly óńir áýejaıyna 6-9 qazan aralyǵynda shetelden 5 áýe reısi qondy. Ystanbul, Antalııa jáne Amsterdamnan jetken ushaqtarmen barlyǵy 408 adam kelipti. Alaıda 67 jolaýshyda koronavırýs ınfeksııasynyń joqtyǵyn dáleldeıtin PTR-test anyqtamasy bolmaǵan.
Sol sebepten bul jolaýshylar karantındik stasıonarlarǵa jatqyzyldy. Barlyq jolaýshydan qaýipti indetke qarsy synama alyndy. Onyń qorytyndysy teris nátıje kórsetti, jolaýshylardyń eshqaısysynan qaýipti ınfeksııa anyqtalǵan joq. Sondaı-aq Atyraý qalasy men aýdandarda qurylǵan 114 mobıldik top karantındik talaptardyń saqtalýyna monıtorıng júrgizip, kún saıynǵy reıd jumysyn kúsheıtti. Qazaqstannyń bas memlekettik sanıtarlyq dárigeriniń qaýlysyn oryndaý maqsatynda 5 shilde men 9 qazan aralyǵynda mobıldi top 1600 reıdtik tekseris júrgizdi. 653 materıal jınaqtalyp, shaǵyn jáne orta kásipkerlikke, sonymen qatar jeke tulǵalarǵa 463 ákimshilik is qozǵalyp, 66 mln 794 myń teńgege aıyppul salynyp otyr. Mobıldi top azyq-túlik dúkenderi men tamaqtaný oryndaryna, kólik jýý ortalyǵy sekildi 139 nysannyń ıelerine 55 592 590 teńge aıyppul saldy. Al karantındik talaptardy buzý deregine qatysty 190 materıal qaralyp jatyr.
Shekteý sharalaryn elemeý turǵyndar tarapynan jıi baıqalady. О́ıtkeni atyraýlyqtar toı, týǵan kúndi atap ótý sekildi sharalardy toqtatpaı tur. Mundaı derekti polısııa qyzmetkerleri 9-11 qazanda mobıldi toptarmen birge júrgizgen reıd kezinde anyqtap otyr.
– «Atyraý» shaǵyn aýdanyndaǵy 17-kóshedegi úıde 40-50 adam, al Mechnıkov kóshesindegi úılerdiń birinde 30-40 adam qatysqan toı ótkizilgen. Stýdentter kóshesinde ornalasqan meıramhanalardyń birinde ótip jatqan toıda 80, «Almagúl» shaǵyn aýdanyndaǵy meıramhanada ótken týǵan kúnde 50-60, Taımanov kóshesindegi meıramhanada 50-60 adamnyń jınalýymen toı ótkeni anyqtaldy. «Jeruıyq» shaǵyn aýdanynda ornalasqan meıramhanadaǵy karaoke-barǵa 15-20 adam jınalǵan. Al «Leshoz» shaǵyn aýdanynda jáne Vladımırskıı kóshesindegi eki kalıan-bar ıesi de karantın rejimine qaramaı, jumys istegeni belgili boldy, – dep habarlady oblystyq polısııa departamenti baspasóz qyzmetiniń jetekshisi Gúlnazıra Muhtarova.
Mine, turǵyndar men meıramhanalar ıeleriniń tarapynan karantındik shekteý sharalaryn saqtamaýy oblystyń bas memlekettik sanıtarlyq dárigeri Asylbek Sharovtyń jańa qaýlyǵa qol qoıýyna sebep bolyp otyr. Endi qaýlyǵa sáıkes 12 qazannan bastap epıdemııalyq ahýal turaqtanǵanǵa deıin uzartyldy. Shekteý sharalarynyń qansha kúnge sozylatyny týraly merzimi naqtylanǵan joq. Demek, uzaqqa sozylýy múmkin.
– О́kinishke qaraı, sońǵy 14 kúnde koronavırýs juqtyrǵandar sany qaıtadan óse bastaǵany baıqalady. Máselen, 28 qyrkúıek pen 4 qazan aralyǵynda indet juqtyrýdyń 5 jaǵdaıy tirkelgen bolsa, 5-11 qazanda 43 jaǵdaı anyqtalyp otyr. Osyǵan sáıkes, indettiń aldyn alý sharalary uıymdastyrylyp, karantın talaptary kúsheıtildi, – dep túsindirdi Asylbek Sharov.
Qaýlyǵa sáıkes atyraýlyqtarǵa alańdarda, saıabaqtarda, skverler men jaǵalaýlarda bir otbasy múshelerin qospaǵanda, 3 adamnan aspaı toptasyp júrýge ruqsat etildi. Sondaı-aq turǵyndarǵa qoǵamdyq oryndarda, qoǵamdyq kólikte, halyqqa qyzmet kórsetý jáne demalýǵa arnalǵan ǵımarattarda, ashyq aýada medısınalyq maska kııý mindetteldi.
– Bes jasqa deıingi balalardy, qoǵamdyq tamaqtaný oryndarynda tamaqtaný jaǵdaılaryn, jeke jáne bes adamnan aspaıtyn toptyq sportpen aınalysatyn adamdardy qospaǵanda, áleýmettik qashyqtyqty mindetti túrde saqtaı otyryp, qoǵamdyq oryndarda, qoǵamdyq kólikte, halyqqa qyzmet kórsetý jáne demalýǵa arnalǵan ǵımarattarda, ashyq aýada medısınalyq nemese mata betperdelerin kııý mindetti, – deıdi bas memlekettik sanıtar dáriger A.Sharov.
Onyń qaýlysymen bir mezgilde jabyq ǵımarattarda 30, ashyq alańdarda 50 adamnan aspaıtyn, keminde 2 metr áleýmettik qashyqtyqty, kúsheıtilgen sanıtarlyq-dezınfeksııalyq rejimdi saqtap, bir otbasynyń múshelerin qospaǵanda bir ústelge 4 adamnan otyrǵyzyp, qoǵamdyq tamaqtandyrý nysandarynyń (dámhanalar, meıramhanalar jáne basqalar) qyzmeti saǵat 08:00-dan 22:00-ge deıin shekteldi. Mundaı shekteý saýda-oıyn-saýyq ortalyqtary, saýda úıleri (býtıkter), saýda jelilerine qoldanylady. Sonymen birge jabyq azyq-túlik jáne azyq-túlik emes bazarlardyń jalpy syıymdylyǵynyń 30%-ynan aspaıtyn tolymdylyǵy kezinde kúsheıtilgen sanıtarlyq-dezınfeksııalyq rejimdi, bir kelýshige 4 sharshy metr esebinen áleýmettik qashyqtyqty saqtap, jumys isteý ýaqyty 17.00-ge deıin qysqartyldy.
Al jattyǵý zaldary men fıtnes-ortalyqtardyń, sport seksııalary men sporttyq-saýyqtyrý ortalyqtarynyń, saıahattaý katerleriniń (ózen tramvaıy) qyzmeti toqtatyldy. Sondaı-aq demalys jáne mereke kúnderi azyq-túlik sýpermarketteri, saýda-oıyn-saýyq ortalyqtary (býtıkter), saýda úıleri men saýda jelileri, azyq-túlik emes jáne azyq-túlik satatyn jabyq bazarlar jumys istemeıdi.
Árıne, mundaı shekteý sharalary qaýipti indettiń taralmaýy úshin qolǵa alynǵany daýsyz. Alaıda buǵan renishin bildirip jatqandar bar. Jaqynyna janashyr bolyp, aǵaıyn-týysynyń amandyǵyn oılaǵandar toı, týǵan kún sekildi sharalardy ótkizýdiń sońy ókinishke uryndyraryn biledi. Desek te, top adamdy jınap toı ótkizý, týǵan kúndi atap ótý, sondaı sharalardan túsirilgen sýretterdi áleýmettik jelide jarııalaý tyıylar emes. Bul maqtanysh pa, álde ózgelerge qyr kórsetý me? Toı men týǵan kúnnen sýretter jarııalaǵandar ózderin ustap beretinin túsinbeıtin sekildi.
Teginde «Saqtansań – saqtarmyn» degendi uǵynatyn, qaýipti indettiń birinshi tolqyny kezinde dári izdep sabylǵandardyń, dem jetpeı, bir jutym aýaǵa zar bolǵandardyń qınalysynan sabaq alatyn ýaqyt jetken joq pa?..
Atyraý oblysy