Qazirgi kezde Jambyl oblysynda koronavırýs indetimen kúres júrgizilýde. Degenmen, birqatar máseleler de bar, dep habarlaıdy Egemen.kz
Oblystyq ákimdik tarapynan Taraz qalasyndaǵy mektepterge zerdeleý júrgizilip, nátıjesinde 8 mektepte sanıtarlyq talaptardy saqtaýǵa baılanysty birqatar kemshilikter anyqtalǵan. Atalǵan máselege baılanysty ótken jıynda oblys ákimi Berdibek Saparbaev kóbinde dezınfeksııalyq dáliz jumys istemeıtinin, keıbir synyp kabınetteriniń kireberisinde dezınfeksııalyq kilemsheler joqtyǵyn aıtqan bolatyn. Sondaı-aq, jaýapty kezeńde keıbir mektep dırektorlary jumys ornynda bolmaǵan bolsa, keıbir mektepterdiń kireberisine týrnıket ornatylmaǵan. Budan ózge de olqylyqtar bar. Berdibek Saparbaev endi osyndaı jaǵdaılardyń oryn almaýy úshin sanıtarlyq talaptardy saqtaý sharalaryn qatań qadaǵalaýdy tapsyrdy.
Jıynda oblys boıynsha taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń mindetin atqarýshy Neılá Mýlıkova taǵy da kúsheıtiletin karantındik talaptardyń tizbegin usyndy. Endi Qyrǵyz jáne Reseı memleketterinde aýrýshańdyq artyp otyrǵandyqtan shekaradaǵy qadaǵalaýdy qatańdatyp, Taraz qalasyna Túrkistan men Almaty oblystarynan kiretin shekaraǵa blok-beketter ornatylady. Sondaı-aq, sanıtarlyq talaptar saqtalmaı otyrǵan mal bazarynyń da jumysyn toqtatý kerektigi aıtyldy. Oblystyq densaýlyq saqtaý basqarmasynyń basshysy Áset Qalıev koronavırýstyń ekinshi tolqynyna ázirlik jaıly aıtyp, «SQ-Farmasııa» jaýapkershiligi shekteýli seriktestiginiń oblys boıynsha ókili Aıjan Tortaeva qajetti dári-dármekter jetkilikti ekenin málimdedi.