Qazaqstanda azamattyq qorǵaý júıesi qyzmetkerleri kásibı merekesiniń belgilengenine bıyl – 25 jyl. 1995 jyly 19 qazan – Qutqarýshy kúni bolyp bekitilgen bolatyn. Sodan bergi shırek ǵasyrda batysqazaqstandyq qutqarýshylar da talaı janǵa qıyn sátte kómek qolyn sozyp, abyroıly eńbek etip keledi.
Keńes ókimeti ydyraǵan kezde Qazaqstannyń órtke qarsy qyzmeti materıaldyq jaǵynan da, tehnıkalyq jaraqtandyrylýy jaǵynan da qıyn jaǵdaıda turǵan qurylym bolatyn. Bólimshelerde órt sóndirý tehnıkasy kónergen, zamanaýı apattyq-qutqarý jabdyǵy jetispedi. Ekonomıkalyq qıyndyqtarǵa baılanysty tehnıkany jóndeý, qosalqy bólshek satyp alý, tipti janar-jaǵarmaı satyp alýǵa qarjy bólinbedi. Tek memleket birte-birte aıaǵyna nyq turǵan soń ǵana jaǵdaı ózgerdi.
Búginde Batys Qazaqstan oblysy aýmaǵynda 3 mamandandyrylǵan órt sóndirý bólimi, sondaı-aq 9 órt sóndirý bólimi jáne 16 órt sóndirý beketi jumys isteıdi. Qyzmet bólimshelerinde barlyǵy 197 tehnıka bar. Munyń 75-i – órt sóndirý kóligi. Jalpy órt sóndirý qyzmetinde 951 adam qyzmet etedi.
Árıne, dabyl soǵylǵanda kún demeı, tún demeı basyn qaterge tigip, tilsiz jaýǵa, túrli qıyn jaǵdaıǵa qarsy attanyp bara jatatyn qutqarýshy toptyń ár múshesi týraly jeke maqala jazsa da artyq etpeıdi. Biz tómende Batys Qazaqstan oblystyq Tótenshe jaǵdaılar departamenti usynǵan qutqarýshy qaısar jandarmen jaqynyraq tanystyrmaqpyz.
25 jyl sapta júrgen
Nıkolaı Valerevıch – Qazaqstan qutqarý qyzmeti paıda bolǵan alǵashqy kúnnen beri sapta kele jatqan sardar.
Azamattyq qorǵaý podpolkovnıgi Nıkolaı Valerevıch Polıshýk 1978 jyly 5 maýsymda Oral qalasynda dúnıege kelgen eken. Azamattyq qorǵaý qyzmet organdarynda 1995 jylǵy 1 qańtardan bastap qyzmet atqarady.
Nıkolaı 1997 jyly Qazaqstan Respýblıkasy Ishki ister mınıstrligine qarasty Pavlodar tehnıkalyq kolledjinde órtke qarsy qorǵanys tehnıgi mamandyǵyn alyp shyqqan. 2012 jyly Batys Qazaqstan ınjenerlik-tehnıkalyq ýnıversıtetinde qurylysshy mamandyǵy boıynsha joǵary bilim aldy.
«Bizdiń Nıkolaı Valerevıch – adamı qasıeti joǵary, keıingi jastarǵa jol kórsetip, ujymda úlken bedelge ıe bolǵan jan. Tańdaǵan kásibin súıispenshilikpen, adal da minsiz atqarady» deıdi áriptesteri.
Valerıı Polıshýk órtke qarsy qyzmet jolynda ártúrli laýazymda boldy. №2 órt sóndirý bóliminiń qaraýyl bastyǵy, №1mamandandyrylǵan órt sóndirý bóliminiń aǵa ınjeneri, «О́rt sóndirý jáne avarııalyq-qutqarý jumystary qyzmeti» memlekettik mekemesi basshysynyń orynbasary laýazymdaryn atqardy. Búgingi tańda Batys Qazaqstan oblystyq Tótenshe jaǵdaılar departamenti «О́rt sóndirý jáne avarııalyq-qutqarý jumystary qyzmeti» memlekettik mekemesiniń órt sóndirý kezekshi qyzmeti jedel kezekshisiniń kómekshisi mindetin atqarady.
Shırek ǵasyr ómirinde Valerıı Polıshýk kýá bolǵan qıyn sátter, ókinishti órt oqıǵalary óte kóp. Tilsiz jaýdyń «tilin» uǵyp, ony tez quryqtaýdyń jolyn tájirıbeli maman ǵana uıymdastyra alady. Nıkolaı Valerevıch tikeleı aralasqan bir oqıǵany eske alaıyq. Bıyl 14 shilde kúni 9 saǵat 27 mınýtta Terekti aýdanyna qarasty Shaǵataı jáne Aqsoǵym aýyldary mańynda qurǵaq shóp pen buta órtendi. Kún jel edi. Jeldiń ekpini sekýndyna 15-20 sekýndqa deıin jetip, ushqyn Jaıyq ózeninen asyp tústi. Al ózenniń arǵy betinde Kolovertnoe aýyly bar edi. Sóıtip, órt saldarynan bir turǵyn úı, bir bos turǵan ıesiz ǵımarat jáne 4 qora-qopsy órtke orandy. Qaýipti aýmaqtan 42 adam, 15 sıyr, 25 qoı-eshki, 30 qus evakýasııalandy. Abyroı bolǵanda adam shyǵyny, jaraqat alǵandar bolǵan joq. Bul Nıkolaı Valerevıch sekildi tájirıbeli mamandardyń qıyn sátte abyrjymaı, saýatty da naqty áreket etýiniń nátıjesi bolatyn.
Otbasynda 2 ul 1 qyz bala tárbıelep otyrǵan Valerıı Polıshýk kásibı qyzmetinde úlgili eńbegi úshin «О́rtke qarsy qyzmet organdaryndaǵy minsiz qyzmeti úshin» III, II, I dárejeli medaldarmen marapattalǵan.
Qutqarý qyzmetiniń qurdasy
Oral qalasyndaǵy mamandandyrylǵan №3 órt sóndirý bóliminiń qutqarýshy-órt sóndirýshisi Aıbek Aımaǵambetov 1995 jyly Batys Qazaqstan oblysy, Qaztalov aýdany, Jalpaqtal aýylynda dúnıege kelgen. Qazaqstandyq azamattyq qorǵaý júıesi sekildi, Aıbek Abaıuly da óziniń ekinshi múshelin toılap otyr.
2002 jyly Jalpaqtal orta mektebiniń tabaldyryǵyn attaǵan Aıbek 2008 jyldan bastap oqýyn Batys Qazaqstan oblystyq mamandandyrylǵan daryndy balalarǵa arnalǵan sport mektep-ınternatynda jalǵastyrdy. Sport mektebinde tálim-tárbıege úırene júrip, sambo úıirmesine qatysty. 2013-2020 jyldar aralyǵynda Batys Qazaqstan gýmanıtarlyq kolledji, keıin ýnıversıtetinde oqyp, dene shynyqtyrý jáne sport fakýltetin aıaqtady.
2016-2017 jyldar aralyǵynda Mańǵystaý oblysy, Beıneý qalasynda áskerı boryshyn ótedi.
Aıbek Abaıuly 2018 jyly jeltoqsan aıynda Ishki ister mınıstrligi Tótenshe jaǵdaılar komıteti Batys Qazaqstan oblystyq Tótenshe jaǵdaılar departamenti О́rt sóndirý jáne Azamattyq qorǵanys jeke quramynyń Oral qalalyq mamandandyrylǵan №3 órt sóndirý bólimine qutqarýshy-órt sóndirýshi bolyp jumysqa turdy.
Aıbek bala kezinen sportqa óte beıim bolǵanyn aıttyq. Aýyldyq, aýdandyq, oblystyq sporttyq is-sharalarǵa belsene qatysyp, talaı júldeli orynǵa ıe bolǵan azamat sambodan sport sheberi. 2013 jyly erler arasynda Qazaqstan Respýblıkasy chempıonatynda 1-oryn, 2013 jyldyń qazan aıynda jasóspirimder arasyndaǵy álem chempıonatynda 3-oryn, 2014 jyly jastar arasynda Qazaqstan chempıonatynda 3-oryndy ıelendi. Aıbek Abaıulynyń sportqa beıimdiligi, salamatty ómiri, fızıkalyq daıarlyǵy kásibı qyzmetinde de únemi kómektesip keledi.
2020 jyly 16 sáýirde Oral qalasynyń Abaı dańǵyly boıynda ornalasqan kópqabatty jataqhanadan órt shyqqan bolatyn. Sol joly 119 adamdy, onyń ishinde 43 balany evakýasııalaýǵa qatysyp, Aıbek Abaıuly turǵyndardyń alǵysyna bólendi.
Qyzmetinde únemi maqtaý estip júrse de Aıbek ózin salmaqty ustaıdy. Jan-jaqty qabiletti, adamgershiligi mol jandy áriptesteri de erekshe qurmet tutady.
Árıne, ómir bar jerde qater de bar. Syn sátte, qıyn jaǵdaıda jedel de saýatty qımyldaıtyn maman qutqarýshylardyń qyzmetine qoǵam árqashan zárý. Kásibı merekesi kezinde biz Azamattyq qorǵanys salasynda júrgen barlyq qutqarýshylar qaýymyn quttyqtap, eńbegine jemis tileımiz!
Batys Qazaqstan oblysy