Turǵyn úı-kommýnaldyq sharýashylyǵy máseleleri jónindegi zańnamaǵa engizilgen túzetýler bıylǵy qańtar aıynan bastap kúshine endi. Endigi kezekte páter ıeleri kooperatıvteri (PIK) ornyna jańa uıym qurylady. Atalǵan jańashyldyq «bir úı – bir birlestik – bir esepshot» prınsıpine negizdelgen.
Menshik ıeleriniń birlestigin memlekettik tirkeý jáne onyń tıimdi atqaratyn qyzmeti týraly ANTIKOR LIVE jobasy aıasynda «Shyǵys – adaldyq alańy» jobalyq keńsesiniń uıymdastyrýymen ótken efırde Shyǵys Qazaqstan oblysy Ádilet departamentiniń tirkeý qyzmeti salasyndaǵy ádistemelik qamtamasyz etý jáne baqylaý bóliminiń basshysy Serjan Muhamedjanov aıtyp berdi.
– 2019 jyldyń 26 jeltoqsanynda «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zańǵa qol qoıyldy. Atalǵan zań osy jyldyń 7 qańtarynan bastap kúshine endi. Zańda TKSh-ny basqarýdyń jańa tetikteri qarastyrylǵan. Eń basty qaǵıda: bir úı – bir birlestik – bir esepshot. Árbir kóppáterli úıdiń turǵyndary arnaıy jınalysta birlestik nemese qarapaıym seriktestik qurý týraly sheshim qabyldaıdy. Menshik ıeleriniń birlestigi – zańdy tulǵa retinde kommersııalyq emes uıym. Ol turǵyndardyń óz ishinen qurylady. Turǵyndar jınalysynda úsh jyl merzimge kóppáterli turǵyn úı keńesi jáne revızııalyq komıssııa saılanady. Sondaı-aq bir jyl merzimge birlestik tóraǵasy belgilenedi. Zań kúshine engen kúnnen bastap bir jyl ishinde kóppáterli turǵyn úı ıeleri jınalys ótkizýleri tıis. Jınalysqa turǵyndardyń keminde 51%-nyń qatysýy mindetti. Iаǵnı turǵyn úıde 100 páter bar dep eseptesek, jınalysqa keminde 51 páter ıesi qatysýy kerek jáne qabyldanǵan sheshimdi kemi 26 menshik ıesi qoldaýy tıis. Joǵaryda aıtyp ótkenimdeı, jınalysta úı keńesi, revızııalyq komıssııa, birlestik tóraǵasy jáne basqarý formasy anyqtalady, – deıdi Serjan Muhamedjanov.
Qazirgi tańda Shyǵys Qazaqstan oblysy boıynsha jalpy 6 menshik ıeleriniń birlestigi qujat tapsyrǵan, alaıda olardyń qoldanystaǵy zańǵa qujattary sáıkes kelmegendikten, tirkeýden bas tartyldy. Keshe qujattary qoldanystaǵy zańǵa sáıkes keletin alǵashqy menshik ıeleriniń birlestigi qurylyp, memlekettik tirkeýden ótti. Onyń ataýy «Astana kóshesi, 6» menshik ıeleriniń birlestigi dep atalady.
Sonymen qatar Serjan Muhamedjanov páter ıeleri kooperatıvteri boıynsha máselege toqtaldy:
– Páter ıeleri kooperatıvteri bir kún ishinde jabylyp qalmaıdy. Páter ıeleri aldyndaǵy mindetterin qanaǵattanarlyq dárejede atqarǵan, turǵyndardyń kóńilinen shyqqan páter ıeleri kooperatıvteriniń jumysyn jalǵastyrýǵa múmkindigi bar. Biraq ol kooperatıvter 2022 jyldyń 1 shildesine deıin ǵana jumys isteıdi. Al odan keıin bul kooperatıvter basqarýshy kompanııa nemese servıstik uıym retinde qaıta qurylyp, qyzmetin jalǵastyra alady.