Atyraýda qaýipti indettiń ekinshi tolqynyna qarsy qamdaný qarqyn aldy. О́ıtkeni munda qaýipti indetke shaldyǵý deregi qaıta baıqalyp otyr. Máselen, 14 qazanda 10 adam, odan keıin 8-9 naýqastan qaýip indet anyqtaldy. Qaýipti indettiń quryǵyna tek oblys ortalyǵynyń ǵana emes, Jylyoı, Qyzylqoǵa aýdandarynyń da turǵyndary ilindi. Sońǵy táýlikterde Teńiz kenishindegi jumysshylardyń da koronavırýs ınfeksııasyna shaldyqqany belgili boldy. Al ótken aptada oblystyq densaýlyq saqtaý basqarmasynyń baspasóz qyzmeti ınfeksııalyq stasıonarlarda 59 naýqastyń emdelip jatqanyn habarlady.
– Sonyń ishinde Atyraý qalasyndaǵy №2 oblystyq juqpaly aýrýlar aýrýhanasynyń ınfeksııalyq stasıonarynda qaýipti indet juqtyrǵan 26 naýqas em alýda. Onyń úsheýi aýrýhananyń jansaqtaý bóliminde jatyr. Olardyń jas erekshelikteri – 40-65 jas, – degen aqparat taratty basqarmanyń baspasóz qyzmeti. – Sondaı-aq, Jylyoı aýdanyndaǵy Teńiz kenishinde ashylǵan ınfeksııalyq stasıonarda 33 naýqas em qabyldaýda. Al aýdandardaǵy ınfeksııalyq stasıonarda emdelip jatqan naýqastar joq.
Degenmen basqarma basshysynyń ýaqytsha mindetin atqarýshy Ashan Baıdýálıevtiń málimetine qaraǵanda, óńirde medısınalyq kómekke júgingenderge 7 995 dáriger qyzmet kórsetedi. Onyń ishinde 7 091 medısına qyzmetkeri memlekettik emdeý uıymdarynda jumys isteıdi. Al jekemenshik klınıkalarda 904 medısına qyzmetkeri bar. Budan bólek oblystyń medısınalyq uıymdary halyqqa kómek kórsetý úshin 224 jasandy tynys alý, 27 rentgen, 10 kompıýterlik tomografııa apparatymen qamtyldy. Sondaı-aq óńir 977 ottegi konsentratory men 1 myń pýlsokısmetrmen qamtamasyz etilip otyr.
– Qazir 400 oryndyq eki modýldik aýrýhananyń qurylysy júrgizilip jatyr. Máselen, Atyraý qalasyndaǵy 200 orynǵa arnalǵan modýldik aýrýhanany qazan aıynyń sońyna taman, al Qulsary qalasyndaǵy 200 oryndyq osyndaı aýrýhanany qarashada paıdalanýǵa berý josparlanyp otyr. Buǵan deıin demeýshilik kómek arqyly emhanalardyń 4-sanatty shaqyrtýlaryn qamtamasyz etý úshin 8 «Shevrolet Damas» markaly avtokólik bólingen edi. Osy aıdyń basynda oblystyq jedel járdem stansasy 22 jańa kólikpen tolyqty. Jedel járdem qyzmetinde 69 arnaıy kólik bar. Endi jaqynda taǵy da 18 medısınalyq jedel járdem kóligi keledi, – deıdi A.Baıdýálıev.
Onyń aıtýynsha, óńirdegi koronavırýs ınfeksııasy boıynsha jaǵdaıdy turaqty deńgeıde deýge bolady. Soǵan qaramastan basqarma tarapynan jahan jurtyn jan alqymynan alǵan qaýipti indettiń yqtımal ekinshi tolqynyna tas-túıin daıyndyqtyń naqty jospary ázirlenip otyr.
– Qaýipti indetti juqtyrǵan naýqastardy emdeý úshin 520 ınfeksııalyq kereýet daıyndaldy. Arnaıy josparǵa sáıkes, qajettilik týyndaǵan tusta 2 080 ınfeksııalyq kereýet, onyń ishinde 120 reanımasııalyq kereýet ashý múmkindigi bar. Iаǵnı ınfeksııalyq stasıonarlar jańa modýldik aýrýhanalarda, oblystaǵy iri aýrýhanalarda, sondaı-aq barlyq aýdandyq aýrýhana men Teńiz ken ornynda ashylatyn bolady, – deıdi A.Baıdýálıev. – Qazir oblysta 8 PTR-test zerthanasy jumys istep tur. Ondaǵy testileýdiń táýliktik qýattylyǵy – 3 636. Al oblystyń 224 jasandy tynys alý apparatymen qamtylǵan medısınalyq mekemelerge qosymsha taǵy 14 apparat jetkiziledi.
Sonymen birge qajetti dári-dármekterdiń, onyń ishinde koronavırýs ınfeksııasyna qarsy preparattardyń úsh aılyq qory jasaqtaldy. Dárihanalar jelisindegi dárilik zattardyń tómendemeıtin qoryn qamtamasyz etý úshin «Atyraý» áleýmettik-kásipkerlik korporasııasy» AQ arqyly turaqtandyrý qoryna 684,5 mln teńgeniń asa qajetti 40 túrli dári-dármekteri satyp alyndy. Buǵan qosa 620,1 mln teńgeniń dárilik zattary turaqtandyrý qorynyń qoımasynda saqtaýly tur. Al 64,4 mln teńgeniń dárilik zattary oblystyń 164 dárihanasyna taratylypty. Buǵan qosa óńirge demeýshilik kómekpen 251,2 mln teńgeniń 9 túrli dári-dármek jetkizildi.
Atyraý oblysy