О́ńirdegi qat-qabat tirlik arnalarynyń qatarynda qyzylaǵashtyqtardyń jaǵdaıy basymdyq alýda. Kún saıyn oblys basshylarynyń qatysýymen jedel shtab otyrysy ótip, onda atqarylǵan qurylys jumystarynyń qorytyndysy men sapasy, jedeldetý kún tártibine ótkir qoıylyp keledi. Nátıjesinde qurylys jumystaryna 69 kompanııa tartylyp, 449 úıdiń orny tolyq tazartylsa, 121 úıdiń qabyrǵalary qalanǵan. Sonymen qatar 23 úıdiń shatyry kóterilip, 10 úıdiń tóbesi tolyq jabyldy. Qurylys jumystarynda úsh jarym myńǵa jýyq adam ýaqytpen sanaspaı eńbek etýde.
Qurylys jumystarynyń eki aýysymda jalǵasýy qatań qadaǵalanǵan. Qyzylaǵash aýylynda eki beton zaýyty qalypty jumys istep tur. Osyǵan qosymsha qurylysqa Taldyqorǵan qalasyndaǵy “ELD Global” jáne “Temirbeton” JShS-lar úzdiksiz daıyn beton qospasyn tasymaldap jetkizýde. Qýaty qysqa merzimde alty mıllıon kirpish daıyndaıtyn “Stroıtel” seriktestigi osy qajettiliktiń tııanaǵyn keltirse, óńirdegi ózge de kirpish zaýyttary oǵan óz úlesterin qosýda.
Qýanyshtysy Qyzylaǵashta jańadan salynǵan alǵashqy úılerdiń qurylysy aıaqtalýǵa jaqyndady. Syrty men ishi sapaly salynǵan, turmysqa qolaıly qajettiliktermen qamtylǵan úıler alystan kóz tartady. Oblys ákimi Serik Úmbetov Qyzylaǵashta 40 jańa úı osy aıdyń sońynda turǵyndar ıgiligine beriletinin aıtyp otyr. Qazirgi qurylys jumystarynyń qarqyny da osyǵan dálel.
Qurylyspen qatar eldi mekendi ınjenerlik kommýnıkasııamen qamtamasyz etý maqsatyndaǵy aýyldyń ishin jaryqtandyrýǵa 6 shaqyrymdyq VL-10 kv. elektr jelisi men 23 shaqyrymdyq VL-04 kv. qurylysy aıaqtaldy. Sonymen qatar tasqynnan zardap shekken Aqtoǵan jáne Eginsý aýyldaryn qalpyna keltirý jumystary da qatar jalǵastyrylýda. Aqtoǵan aýylynda “Almatyqurylys” kompanııasynyń kúshimen 9 úıdiń irgetasy, 6 úıdiń qabyrǵasy qalanyp, munda da 200 adam eńbek etýde. Al, Eginsý aýylynda jaramsyz úılerdi buzyp, qurylysqa jańa nysandardyń ornyn daıyndaýmen “Obltıajstroı” seriktestigine qarasty 68 qurylysshy aınalysýda.
“Qazaqstan temir joly” AQ sý tasqynynan zardap shekken Eginsý eldi mekenindegi jolserikter baspanasyn óz qarjysy esebinen qalpyna keltirýdi uıǵaryp, munda da otyz úsh úı turǵyzylatyn boldy.
Qyzylaǵash aýylyndaǵy zardap shekken turǵyndarǵa materıaldyq kómek aýdarý jumysy jalǵasýda. Osy ýaqytqa deıin “Qazposhta” AQ-tyń Almaty oblystyq fılıaly arqyly 2702 adamǵa 34 mln. 628 myń teńge qarjy aýdarylypty.
Aýyldy abattandyrý men kógaldandyrýǵa jastar uıymdary belsene qatysyp, senbilikter uıymdastyrýda. О́tken senbide Taldyqorǵan qalasyndaǵy oqý oryndarynyń 300 stýdenti kúni boıy qalpyna keltirý jumystaryna qatysty. Ál-Farabı atyndaǵy Qazaq Ulttyq ýnıversıtetiniń bastamasymen “Jaqynyńa járdemdes” aksııasyna qatysýshy jýrnalıster Qyzylaǵash ózeniniń shyǵys jaǵyndaǵy keleshektegi saıabaq ornalasatyn alańǵa qaıyń kóshetterin otyrǵyzdy. Aýyl turǵyndary halyqtyń kómegi men qoldaýyna shyn peıilden alǵystaryn aıtýda.
Sý tasqynynan zardap shekkenderge Úkimet rezervinen, ulttyq kompanııalardan, Astana, Almaty qalalary men oblystardan, jeke azamattardan, qoǵamdyq jáne kommersııalyq uıymdardan kómek qarjysy áli de kelip túsýde. Keshegi kúngi málimet boıynsha bul qarjynyń kólemi 3 mlrd. teńgeden asqan.
Kúmisjan BAIJAN, Almaty oblysy.