Búginde Jańaqorǵan aýdany aýylsharýashylyq salasy alǵa ozyp, óndirisi órge basqan óńirge aınalyp keledi. Aýdanda birneshe zaýyt jumys istep, ondaǵy turǵyndardy turaqty jumyspen qamtýda. Ásirese qos birdeı ák zaýytynyń sońǵy ýaqytta áleýeti artqan. О́nimine suranys joǵary, dep habarlaıdy Egemen.kz Qyzylorda oblysy ákiminiń baspasóz qyzmetine silteme jasap.
Aýdandaǵy "Premıým klass stroı" JShS ák zaýytynyń ági arzan bolǵanymen, sapasy óte joǵary deıdi tutynýshylar. Qazir ondaǵy ónim óńdeıtin peshteri kógildir otynǵa qosylyp, jumysshylardyń jumysyn jeńildetip qana qoımaı, shyǵyndy da azaıtty. Mamandardyń aıtýynsha, 980-1000 gradýs ystyqta tas kúıip, odan ák bólinip shyǵady. Bir ereksheligi, ónimniń shıkizaty túgeldeı Jańaqorǵan jerinde bar. Ákke dalamıt tastar paıdalynady. О́nimge degen suranystyń artqany sonsha, ótken jylǵy osy merzimmen salystyrǵanda ónim óndirý 10 esege ósken. Seriktestik ókili Qurmanǵazy Bolatulynyń aıtýynsha ónerkásipke jergilikti 28 azamat jumysqa ornalasyp, olar 250 - 300 myń teńge kóleminde jalaqymen qamtylǵan. Mundaǵy áktiń quny bazar baǵasynan tómen, túıirshikti áktiń kelisi - 38 teńge, untaq ák - 32 teńgeden satylýda.
Aýdandaǵy "Qýat Ák" JShS-niń jumysy da qazir jandanyp keledi. Zaýyttyń ónim óńdeý ádisi eski bolǵanymen, áktiń sapasynda min joq. О́nerkásip ıesi Nárzilda Ysqaqov zaýyttyń qural-saımandaryn birtindep jańartyp, zamanýı júıege kóship jatqandyǵyn aıtady. О́nim kólemin arttyryp, jumysshylardyń sany kóbeıtý seriktestiktiń basty maqsatyna aınalǵan.
Bir jaqsysy munda qazir eshbir qaldyqsyz ák óńdelip jatyr. Sońǵy ýaqytta kórshiles oblystardan da suranys kóptep túsip, ónerkásiptiń órkendeýine áser etken.