KSRO Halyq ártisi, Qazaq KSR halyq ártisi, Sosıalıstik Eńbek Eri, KSRO jáne Qazaqstan memlekettik syılyqtarynyń laýreaty, qoǵam qaıratkeri, professor, pedagog, barıton daýysty asa kórnekti keńes jáne qazaq opera ánshisi Ermek Bekmuhameduly Serkebaev jasy 88-ge qaraǵan shaǵynda ómirden ozdy.
Ermek Serkebaev 1926 jylǵy 4 shildede Petropavl qalasynda týǵan. Ol 1941-1943 jyldary Almaty mýzykalyq ýchıldıshesinde skrıpka synyby boıynsha oqyp bilim aldy. 1951 jyly Almaty konservatorııasyn professor A.M.Kýrganovtyń án synyby boıynsha bitirdi. Al 1947 jyldan bastap Qazaq opera jáne balet teatrynda solıst bolyp eńbek ete bastady.
О́ziniń tańǵajaıyp talanty arqasynda Ermek Bekmuhameduly 1953, 1956 jáne 1957 jyldary Búkilálemdik jastar men stýdentter festıvaliniń laýreaty atandy.
Ánshiniń repertýarynda negizinen orys jáne shet el klassıkalyq týyndylarynyń basty rólderi boldy. Sonyń ishinde Jubanov pen Hamıdıdiń «Abaı» operasyndaǵy Abaı partııasyn oryndady. Al Dj. Rossınıdiń «Sevıl shashtarazy» operasyndaǵy Fıgaro róli ártisti jańa qyrynan tanytyp, oǵan álemdik deńgeıdegi dańq alyp berdi. Ony sondyqtan da Dmıtrıı Gnatıýk «barıtondardyń koroli» dep atasa, Mýslım Magomaev «Keńes Odaǵyndaǵy eń úzdik Fıgaro» dep baǵalady. Osy partııamen ol álemniń kóptegen elderiniń sahnalarynda óner kórsetip, óshpes iz qaldyrdy.
Ermek Serkebaev 1973 jyldan Almaty konservatorııasyda vokal synyby boıynsha sabaq berdi. Professor birneshe dúrkin halyqaralyq bedeldi konkýrstardyń tóraǵasy jáne múshesi qyzmetin atqardy. Solardyń ishinde M.I. Glınka men P.I. Chaıkovskıı atyndaǵy halyqaralyq konkýrstar da bar edi.
Ermek Serkebaev uzaq tvorchestvolyq jolynda «Qazaqfılm» túsirgen 4 fılmge de túsip úlgerdi.
Italıandar úshin Enrıko Karýzo, orystar úshin Fedor Shalıapın qandaı oryn alsa, Ermek Serkebaev qazaqtar úshin tap sondaı dárejede boldy.
О́mirge sırek keletin daryn ıesi, halqymyzdyń maqtanyshy Ermek Serkebaev osylaı ómirden ótip bara jatyr.
Marqumnyń jatqan jeri jaıly, topyraǵy torqa bolsyn!