Endigi jerde kásipkerler barlyq nesıeleriniń júgin azaıta alady. Sońǵy kúnderdegi eń jaǵymdy jańalyqtyń biri – Qazaqstan Úkimeti "Jeke kásipkerlikti memleket tarapynan qoldaýdyń keıbir sharalary týraly" qaýlyǵa ózgerister bekitti, dep habarlaıdy Egemen.kz.
Ol boıynsha daǵdarystan zardap shekken ekonomıka sektorlaryndaǵy shaǵyn jáne orta bızneske kómek kórsetiletin bolady.
Dástúrli joldaýynda prezıdent Qasym-Jomart Toqaev: "shaǵyn jáne orta bıznes óte qıyn kezeńderdi bastan keship otyr. Pandemııanyń soqysy aldymen solarǵa tıdi" – degen edi.Prezıdent Úkimetke shaǵyn jáne orta bızneske memleket tarapynan qosymsha qoldaý kórsetýdi, atap aıtqanda: nesıelerin jeńildikpen qaıta qarjylandyrýdy tapsyrǵan bolatyn. Jańa bekitilgen ózgerister boıynsha, COVID-19 pandemııasynan týyndaǵan daǵdarys kezinde zardap shekken kásipkerler 2020 jyldyń 31 tamyzyna deıin alynǵan lızıng mámileleri men nesıelerin "Damý" Qory arqyly ishinara sýbsıdııalaı alady.
Qoldaý kórsetiletin kompanııalar men kásiporyndar qataryna jeke saýda salasyndaǵy, qonaq úı, týrıstik qyzmet, kınoteatr, fıtnes-ortalyqtar, kólik jóndeý men tehservıs qyzmeti, mektepke deıingi jáne bastaýysh bilim berý sekildi qyzmet kórsetetin 29 túrli sala engen.
"О́zgeris shartttaryna sáıkes, kásipker nomnal mólsherlemeniń tek 6%-yn ǵana tóleıdi. Al aıyrmasyn memleket ótep beredi", – dedi "Damý" kásipkerlikti damytý qory" AQ ókilderi.
Baǵdarlamaǵa qatysýdaǵy basty shartardyń biri – kásipkerde 2020 jyldyń 16 naýryzy kúnin esepke alǵandaǵy merzimde 180 kúnnen asqan nesıe mólsherlemesi jáne/nemese negizgi qaryzy boıynsha keshiktirý, qaryzy bolmaýy kerek.
Qoldaýdyń jańa sharasy 2020 jylǵy 16 naýryz ben 2021 jylǵy 15 naýryz aralyǵyndaǵy kezeńge (sýbsıdııalaý kezeńi) kózdelgen, bul rette nesıe boıynsha syıaqynyń nomınal mólsherlemesi 16 naýryz ben 31 tamyz aralyǵyndaǵy kezeńge shektelmegen, 2021 jylǵy 1 qyrkúıek pen 15 naýryz aralyǵyndaǵy kezeńge 18%-dan aspaýǵa tıis.
Memleketten qoldaý alý úshin kásipkerler bıyl 30 qazanǵa deıin bankke ótinim berýi qajet, budan ári «Damý» Qory bankter bergen tizilimder men saýalnama-ótinishter negizinde 5 jumys kúninen aspaıtyn merzimde sýbsıdııalaý múmkindigi týraly sheshim qabyldaıdy.