Oral qalasynda turatyn qart kúıshi-dombyrashy, qazaq kúı óneriniń altyn qoryna birneshe kóne kúıdi jetkizgen óner ıesi О́tegen Jumashuly toqsan jasqa toldy. Dál osy kúni Qurmanǵazy atyndaǵy Qazaq Ulttyq konservatorııasy oqý-ádistemelik keńesiniń maquldaýymen jaryq kórgen «Darııa-kúıdiń kemesi» atty jınaq keıipkerdiń qolyna tıdi.
О́tegen Jumashuly 1930 jyly qazan aıynda Qum Narynda – Batys Qazaqstan oblysy Orda aýdany Terekti aýyl sovetinde dúnıege kelgen. Jasynan jetimdik kórdi. Balalyq shaǵyn soǵys sharpydy. Jigit shaǵynda týǵan jeri polıgonǵa aınalyp, «aqtaban shubyryndyǵa» ushyrady. Eriksiz sonaý Ońtústik Qazaqstan oblysyna kóshirildi. Ol jaqtan 1958 jyly týǵan jerge qaıtyp, shalǵaıdaǵy Jánibek aýdanynyń bir aýylynda qarapaıym esepshi bolyp ómir súrdi.
О́ner qadirin biletin jandar О́tegen Jumashevty bir aýyzdan dástúrli kúı óneriniń kózi tiri ókili, qaımaǵy buzylmaǵan qazaqy dombyra únin jetkizýshi sanaıdy. El ishindegi Qojahmet, Taıtorynyń Qojaǵy, Ǵılaj kúıshi syndy ónerpazdardan Soqyr Esjan, Qurmanǵazy, Dáýletkereı, Músiráli, Seıtek kúılerin úırenedi. О́tegen aǵanyń bir qasıeti – áýeli ózi tartatyn kúıdiń hıkaıasyn aıtyp, tyńdarmandy daıyndap alady. О́ıtkeni baǵzydan jetken daǵdy solaı. О́ziniń qaıyn atasy Shaıhy kezinde áıgili Seıtektiń serigi, qosshysy bolǵan eken. «Atam kóp sóılemeıtin, tuıyq kisi edi. Biraq Seıtek týraly áńgime estise ornynan atyp turyp, kópshigin quıryǵyna qoıyp, áńgimege aralasa ketetin» deıdi ózi.
Bir qyzyǵy, aýylynan uzap shyqpaǵan О́tegendi alys astanadan arnaıy izdeýshiler kóp bolypty. Bul árıne, О́tegen aǵanyń boıyndaǵy ónerdiń qudireti bolatyn. 1965 jyly M.Áýezov atyndaǵy ádebıet jáne óner ınstıtýtynan belgili óner zertteýshisi Tymat Merǵalıev, Qazaq KSR Ǵylym akademııasy fılısofııa jáne quqyq ınstıtýtynan Mustafa Ysmaǵulovtar kelip, Mahambettiń «О́kinish», Seıtektiń «Bes qyz» kúılerin, «О́teǵalıdyń ánin» jazyp alǵan. Sol jyly 30 qazanda «Lenınshil jas» gazetinde «Mahambet – kompozıtor» degen maqala shyǵyp, Mahambettiń «Qaıran Naryn», «Jumyr Qylysh», «О́kinish» kúıleri týraly qalyń el sonda tuńǵysh bilgen edi.
1977 jyly Qazaq KSR Ǵylym akademııasynyń arnaıy ekspedısııasy quramynda О́tegen aǵany izdep kelgen Murat Áýezov pen Bolat Qaraǵulov ta halyq kúıi «Narıdirgenniń» bir nusqasyn, Naqyshtyń «Aıjan apaı», «Aqjeleń» kúılerin, Músiráliniń «Músiráli», Qojaqtyń «Aqsaq ker at» shyǵarmalaryn jazyp alyp ketken.
Degenmen О́tegen Jumashev osy sanaly ǵumyrynda óner adamy retinde qurmettelip, óz baǵasyn aldy dep aıtý qıyn. О́mir boıy esep-qısaptyń aınalasynda júrdi. Jánibek aýdanyndaǵy «Tegisshil», «Borsy» sovhozdarynda qyzmet etti. 1992 jyly zeınet demalysyna shyǵyp, Oral qalasyna kóship keldi. О́z qolymen beınettenip úı turǵyzdy. Qazirge deıin sol úıde qońyrtóbel kún keship jatqan jaıy bar.
Qart kúıshiniń qadirine jetip, sońǵy jyldary eńbegin elge tynymsyz nasıhattap júrgen jan – Qazaqstannyń eńbek sińirgen qaıratkeri, professor Kárıma Saharbaeva der edik. Joǵaryda aıtylǵan «Darııa-kúıdiń kemesi» atty kitap ta dál osy Kárıma Súndetqyzynyń tikeleı kúsh salýymen jarııalanyp otyr.
– О́tegen Jumashulynyń qazaqtyń kúı qazynasyna qosqan úlesi úlken. Mahambettiń bir ǵana «О́kinish» kúıi nege turady?! Seıtektiń «Tory aty», Qojaqtyń «Aqsaq ker aty», Naqyshtyń kúıleri qazaq ónerine qosylǵan aıryqsha shyǵarmalar. Sondaı-aq О́tegen aǵaıdyń syndarly oryndaýshylyq úrdis mektebi – áli syr-qupııasy ashylmaǵan qazyna, – deıdi óner zertteýshisi.
Dáýlesker dombyrashyny shaý tartyp qalǵan shaǵynda kórse de, asyl tastyń baǵasyn tap basyp tanı biletin zergerdeı bolǵan Kárıma Súndetqyzy úshbý kitabynda О́tegen Jumashulynyń ónerine erekshe tánti bolǵanyn jasyrmaıdy. «О́tegen aǵaıdyń kúı shejiresin jetkizýdegi ekpini, pernege syr bitirýdegi sıqyry, ony sóıletýdegi naqtylyǵy – kúıshi mineziniń baısaldylyǵynan, ózi oryndaıtyn shyǵarmalardyń mazmunyna tereń boılaǵandyǵynan dep boljadym» deıdi tájirıbeli ónertanýshy.
Dál osy Kárıma Saharbaevanyń tapsyrýymen 2018 jyly konservatorııany bitirýshi bir túlek «Kúıshi О́tegen Jumashevtyń shyǵarmashylyǵy» atty taqyrypta dıplom jumysyna ózek etip aldy. 2019 jyly Oral qalasynda Isataı men Mahambet batyrlarǵa eńseli eskertkish ashylyp, «Babalardyń órshil rýhy» atty ǵylymı-praktıkalyq konferensııa ótken kezde О́tegen Jumashuly da qurmettelip, Mahambet syılyǵynyń ıegeri atandy. Osynyń aldynda ǵana oraldyq taǵy bir dástúrli kúıshi Edige Nábıevtiń shyǵarmashylyǵyna arnalǵan «О́risti óner ónegesi» atty kitap jaryq kórgen edi. Ony Kárıma Saharbaevamen birge jergilikti ólketanýshy, jýrnalıst Nurtas Safýllın qurastyrǵan. Mine, osy qos avtor О́tegen Jumashuly týraly jınaqty da qolǵa alyp, pandemııa qıyndyqtaryna qaramastan shyǵaryp úlgeripti. Kitaptyń súıinshi danasy dál 90 jasqa tolǵan kúni qart kúıshiniń qolyna tıgeni qandaı qýanysh deseńizshi!
О́nerge qosqan úlesi Qap taýynan úlken bolsa da keýde kermeıtin qarapaıym adamdar bolady. О́tegen aǵa Jumashev – osy qatardan. О́z basym «Darııa-kúıdiń kemesi» atty kitaptyń muqabasyndaǵy kúıshi sýretin kórip, kózime jas úıirdim. «Toqsanǵa jasy kelse de el-jurtyna qadiri tolyq bilinbeı, baǵasyn tolyq almaı ketti-aý» dep júrgende ǵaıyptan osyndaı kitap shyǵaryp, búkil qazaq halqynyń moınyndaǵy qaryz ben paryzdy túsirgen professor Kárıma Saharbaevaǵa myń alǵys aıtamyz!
«Darııa-kúıdiń kemesi» jınaǵynda О́tegen Jumashevtyń ómirbaıany men ol oryndaǵan kúılerdiń notasynan bólek qundy málimetter de kóp. Máselen, kúıshi óz repertýaryndaǵy kúılerdiń avtorlary men tarıhy týraly áńgimelerdi, ózi kezdesken kúıshiler men óner zertteýshileri týraly estelikterdi kópten beri muqııat qaǵazǵa túsire beripti. Tipti aýyldyń kórkemónerpazdar ujymyn basqarǵan kezde uıymdastyrǵan konsertteriniń baǵdarlamasy da joǵalmaǵan. Osyǵan qaraǵanda О́tegen aǵaı ózin, ónerin izdeıtin bir jannyń kelerin áýelden kútip, daıyndalǵan sekildi kórinedi. Sol kezdesýdiń kesh te bolsa bolǵany qandaı jaqsy.
Batys Qazaqstan oblysy