Oral qalasynda ótken «Izgilikti qala» sımpozıýmynda jergilikti músinshilerdiń qolynan shyqqan 10 shaǵyn músin shahardyń shyraıyn keltire tústi.
Sýretshiler sımpozıýmy qala kúni merekesine oraı Oral qalasy ákimdiginiń qoldaýymen uıymdastyryldy. Demeýshilerdiń kúshimen Aqtaýdan arnaıy ákelingen aq tas materıaldy jergilikti 7 sýretshi bir aı boıy qashap-jonyp, shaǵyn sáýlet músinderin jasap shyqty.
– Sımpozıýmǵa jergilikti talantty sýretshiler, Qazaqstan Sýretshiler odaǵynyń músheleri Erǵalı Bekeshov, Baqytqalı Orazov, Áshim Tasqalıev, Ashat Ábdeshov qatysty. Odaq múshesi bolmasa da sheberligimen tanylǵan Manas Aqqojın, Asylan Serikbaev syndy sýretshiler de ónerin ortaǵa saldy. Osylaısha «Tumar», «Baqyt», «Ańyz», «Januıa», «Sýretshi», «Mýzykant», «Alan», «Minájat» t.b. san túrli taqyrypty shaǵyn skýlptýra alleıasy dúnıege keldi, – deıdi osy istiń basy-qasynda júrgen belgili sýretshi, Qazaqstan Sýretshiler odaǵy Batys Qazaqstan oblystyq fılıalynyń tóraǵasy Qaıyr Orazǵalıev.
Aıta keteıik, Oral qalasynda dál osyndaı músinshiler sımpozıýmy 2003 jáne 2015 jyldary uıymdastyrylǵan bolatyn. Ol kezde paıda bolǵan músinder búginde Jaıyq jaǵasyndaǵy jasyl qalanyń ajyramas atrıbýttaryna aınalǵan.
Batys Qazaqstan oblysy