Nur-Sultanda qyzdy zorlamaq bolǵan er adam ustaldy, dep habarlaıdy Egemen.kz Ulttyq ulannyń baspasóz qyzmetine silteme jasap.
Oqıǵa 30 qazan kúni keshki ýaqytta oryn alǵan. Qaladaǵy Baıqońyr aýdanynda turatyn áıel habarlasyp, belgisiz er adam 1995 jyly týǵan qyzyn zorlamaq bolǵanyn aıtqan. Qyz qoryqqanynan aıqaılap jiberipti. Qatty daýystan sekem alǵan qaskúnem úılerdiń aýlasyna tyǵylyp úlgeripti.
"Kúdiktiniń belgilerin alyp, Ulttyq ulannyń áskerı qyzmetshileri kelgen polısııa qyzmetkerimen birge izdeýge kirisipti. Nátıjesinde, 20 mınýt ishinde sıpattamasy boıynsha sáıkes kelgen B. esimdi azamatty ustaǵan. Ol 1972 jyly týǵan Aqmola oblysynyń azamaty bolyp shyqty", dep habarlady Ulttyq ulannyń ókilderi.
Jábirlenýshi kúdiktini jazbaı tanyǵan. Tártip saqshylary kúdiktini odan ári tergeý úshin Baıqońyr aýdanynyń polısııasyna jetkizdi.